मुलाने स्वतःच्या अपहरणाचा कट रचून वडिलांकडेच खंडणी मागितल्याची धक्कादायक घटना उघडकीस आली आहे. राजस्थानच्या जयपूरमध्ये ही घटना घडली. या प्रकरणी मुलासह त्याच्या दोन मित्रांना अटक केली आहे.

राजस्थानच्या जयपूरमध्ये एका तरुणाने उधार घेतलेले पैसे चुकते करण्यासाठी वडिलांनी पैसे दिले नाहीत म्हणून स्वतःच्या अपहरणाचा कट रचल्याची घटना उघडकीस आली आहे. आपल्या मित्रांच्या मदतीने त्याने वडिलांकडे खंडणी मागितली. जयपूर पोलिसांनी काही तासांतच या अपहरणाच्या घटनेचा छडा लावला.

मालवीय नगरमध्ये एका तरुणाचे अपहरण झाल्याची माहिती जयपूर पोलिसांना मिळाली. अपहरणकर्त्यांनी व्हिडिओ प्रसिद्ध करून मुलाच्या वडिलांकडे खंडणी मागितली होती. मुलाचे हायपाय बांधले होते. तसेच दोन जण त्याला मारहाण करत असताना व्हिडिओत दिसत होते. हा व्हिडिओ अजमेरच्या केकडीत राहणाऱ्या मुलाच्या वडिलांना पाठवण्यात आला होता. हा व्हिडिओ मोबाइलवर येताच कुटुंबीयांना धक्काच बसला.

त्यांनी पोलिसांत तक्रार दिली. पोलिसांनी घटनेचे गांभीर्य लक्षात घेऊन तातडीने तपास सुरू केला. पोलिसांनी काही तासांतच आरोपींना गजाआड केले. जयपूर पोलिसांनी सांगितले की, केकडी येथील रहिवासी प्रेम सिंह यांनी मुलाच्या अपहरणाची तक्रार दिली होती. त्यांच्याकडे विचारणा केली असता, मुलगा दोन दिवसांपासून पैशांची मागणी करत असल्याचे त्यांनी सांगितले. त्याच दिवशी रात्री साडेबारा वाजता त्यांच्या मोबाइलवर एक व्हिडिओ आला. त्यात अपहरणकर्त्यांनी त्यांच्या मुलाला बांधून ठेवले होते. तसेच अपहरणकर्ते अडीच लाखांची खंडणी मागत होते.

पोलिसांनी तातडीने कारवाई करून आरोपींना अटक केली. त्यांच्याकडे चौकशी केली असता, अपहरणाचा कट मुलानेच रचल्याची माहिती त्यांनी दिली. अपहरणकर्ते हे त्याचेच मित्र असल्याची माहिती उघड झाली. पोलिसांनी तिघांनाही अटक केली आहे.

Leave a Reply

Your email address will not be published. Required fields are marked *

You cannot copy content of this page