🛑पश्चिम घाट पर्यावरण संवेदनशील क्षेत्राच्या मसुदा अधिसूचनेवर २६ सप्टेंबरपर्यंत हरकती नोंदवाव्यात.

◼️सावंतवाडी, कुडाळ, कणकवली, देवगड व वैभववाडी तालुक्यांतील १९८ गावांचा समावेश.

✒️लोकसंवाद /- सिंधुदुर्ग.

केंद्र शासनाच्या पर्यावरण, वन व वातावरण बदल मंत्रालय, भारत सरकार, नवी दिल्ली यांच्याकडून पश्चिम घाट पर्यावरण संवेदनशील क्षेत्र घोषित करण्यासाठी क्र. का. आ. ४१०६ (अ), दि. २७ जुलै २०२६ अन्वये मसुदा अधिसूचना जारी करण्यात आली आहे. सदर मसुदा अधिसूचना egazette.gov.in या संकेतस्थळावर उपलब्ध असल्याचे उप वनसंरक्षक (प्रा.) मिलिश शर्मा यांनी कळविले आहे.

प्रस्तुत मसुदा अधिसूचनेनुसार महाराष्ट्र राज्यातील १३ जिल्ह्यांमधील ५६ तालुक्यांतील २ हजार ५९५ गावांचे क्षेत्र पर्यावरण संवेदनशील क्षेत्र (ESZ) म्हणून घोषित करण्याचा प्रस्ताव आहे. यामध्ये सिंधुदुर्ग जिल्ह्यातील सावंतवाडी, कुडाळ, कणकवली, देवगड आणि वैभववाडी या पाच तालुक्यांतील १९८ गावांचा समावेश करण्यात आला आहे.

पश्चिम घाट पर्यावरण संवेदनशील क्षेत्र म्हणून घोषित करण्याच्या प्रस्तावामुळे ज्या स्थानिक रहिवाशांवर परिणाम होण्याची शक्यता आहे, त्यांनी Environment (Protection) Act, 1986 व Environment (Protection) Rules, 1986 मधील तरतुदींनुसार आपले आक्षेप/हरकती विहित मुदतीत नोंदवाव्यात.

मसुदा अधिसूचनेवर ६० दिवसांच्या आत म्हणजेच दि. २६ सप्टेंबर २०२६ पर्यंत हरकती नोंदविता येणार आहेत. हरकती केंद्र शासनाच्या पर्यावरण, वन व वातावरण बदल मंत्रालय, इंदिरा पर्यावरण भवन, जोरबाग रोड, नवी दिल्ली – ११०००३ या पत्त्यावर पाठवाव्यात. तसेच esz-mef@nic.in या ई-मेलवरही आक्षेप नोंदविणे आवश्यक आहे.