🛑आमदार निलेश राणे यांच्या माध्यमातून कुडाळमध्ये मोकाट गुरांसाठी कोंडवाडा मंजूर.

◼️नगराध्यक्ष प्राजक्ता शिरवलकर यांचे विशेष प्रयत्न.

✒️लोकसंवाद /- कुडाळ.

आमदार स्थानिक विकास कार्यक्रम अंतर्गत कुडाळ नगरपंचायत हद्दीत दत्तनगर येथे मोकाट गुरांना कोंडवाडा उभारण्यासाठी आमदार निलेश राणे यांच्या माध्यमातून १५ लाख रुपये मंजूर करण्यात आले आहे. यामुळे कुडाळ शहरातील मोकाट गुरांचा प्रश्न कायमचा मिटणार आहे. यासाठी कुडाळ नगराध्यक्षा प्राजक्ता शिरवलकर यांनी विशेष प्रयत्न केले.

कुडाळ शहर सिंधुदुर्ग जिल्ह्यातील मध्यवर्ती शहर असल्यामुळे शहरात गाड्यांची मोठी रहदारी असते. अशातच मोकाट गुरांमुळे वाहनचालकांना त्रास होत असून वाहतुकीस अडथळा निर्माण होतो. शिवाय बाजारपेठेमध्ये ही वाहने मुकाटपणे फिरत असल्यामुळे स्थानिक व्यापाऱ्यांसह ग्राहकांना देखील मनस्ताप सहन करावा लागतो. रात्रीच्या वेळी अनेकदा वाहनचालकांना अंदाज न आल्यास अपघाताची शक्यता देखील नाकारता येत नाही. मोकाट गुरांमुळे उद्भवणाऱ्या या सर्व समस्यांकडे कुडाळ नगराध्यक्षा प्राजक्ता शिरवलकर यांनी आमदार निलेश राणे यांचे निवेदनाद्वारे लक्ष वेधले होते. आमदार निलेश राणे यांनी या निवेदनाला सकारात्मक प्रतिसाद देत कुडाळ नगरपंचायत हद्दीत दत्तनगर येथे १५ लाखांचा निधी मंजूर केला आहे. त्यामुळे कुडाळ शहरातील मोकाट गुरांचा प्रश्न कायमचा मार्गी लागणार असून याबाबत कुडाळ नगराध्यक्ष प्राजक्ता शिरवलकर यांनी आमदार निलेश राणे यांचे आभार मानले आहेत.