🛑शिवसेनेच्या सभेत आगामी निवडणुकाबाबत महत्वपूर्ण निर्णय..

🖋️लोकसंवाद /- वेंगुर्ला.

आगामी सर्व निवडणुकांमध्ये भाजप, राष्ट्रवादी व मित्रपक्षांशी युतीचा निर्णय व शिवसेनेचे उमेदवार ठरविण्याचे सर्वाधिकार आमदार दीपक केसरकर यांनाच आहेत, असा महत्त्वपूर्ण ठराव शिवसेनेच्या मासिक सभेत घेण्यात आला. शिवसेना जिल्हा समन्वयक सचिन वालावलकर यांच्या प्रमुख उपस्थितीत झालेल्या या सभेत आगामी निवडणुका व शिवसेना पक्ष बळकटीकरणाबाबत महत्वाचे निर्णयही घेण्यात आले. या सभेस तालुकाप्रमुख नितीन मांजरेकर, शहरप्रमुख उमेश येरम, युवासेनेचे जिल्हाप्रमुख हर्षद डेरे, कोस्टल विभागाचे तालुकाप्रमुख काशिनाथ नार्वेकर, उपजिल्हाप्रमुख सुहास कोळसुलकर, युवासेनेचे तालुका प्रमुख स्वप्निल गावडे, महिला आघाडी उपजिल्हाप्रमुख शीतल साळगावकर, तालुका महिला संघटक दिशा शेटकर, शहर महिला संघटक अॅड. श्रद्धा बाविसकर, संतोष परब यांच्यासह उपतालुकाप्रमुख,
विभागप्रमुख, शाखाप्रमुख आदी पदाधिकारी व शिवसैनिक मोठ्या संख्येने उपस्थित होते.
आगामी दोन महिन्यात जिल्हा परिषद, पंचायत समितीसह वेंगुर्ले नगरपालिकेची निवडणूक होणार आहे. नगरपालिकेच्या तयारी निवडणुकीसाठीची शासकीय पातळीवर झालेली आहे.

नगराध्यक्ष पदाच्या आरक्षणाबरोबरच नगरसेवक पदांची आरक्षणेही जाहीर झाल्याने कोणत्या प्रभागात शिवसेनेचे कोण-कोण उमेदवार असतील, याचा आराखडा तयार होत आहे. प्रत्येक प्रभागात शिवसेनेमध्ये तीन ते चार प्रबळ दावेदार इच्छूक आहेत, ही आमची जमेची बाजू आहे. राज्यात व केंद्रात भाजप, शिवसेना, अजित पवार राष्ट्रवादी काँग्रेस व मित्रपक्षांच्या युतीची सत्ता आहे. त्यामुळे आगामी निवडणुकांमध्येही ही युती कायम राहील, अशी अपेक्षा आहे. मात्र, युती करावी की स्वबळावर लढायचे, याचे निर्णय वरिष्ठ नेते घेणार आहेत. मुख्यमंत्री देवेंद्र फडणवीस यांनी शक्य आहे तेथे युती करण्याचे सुतोवाच केले असल्याने नेमका काय निर्णय होतो, याकडे आमचेही लक्ष लागून आहे. मात्र, स्वबळावर निवडणूक लढण्याचा निर्णय झाल्यास आम्ही पूर्णपणे तयार आहोत, असे वालावलकर म्हणाले. राज्याच्या राजकारणात माजी शालेय शिक्षणमंत्री आमदार दीपक केसरकर हे वजनदार नेते आहेत. त्यामुळे आगामी निवडणुकांसाठी सिंधुदुर्ग जिल्ह्यात युती होणार की नाही, याचे निर्णय केसरकर यांच्या सहभागाने तिन्ही पक्षाच्या नेत्यांमध्ये होणाऱ्या बैठकीत
निश्चित होईल. वेंगुर्ले तालुक्यात युतीसोबत निवडणूक लढवावी की स्वबळावर लढावे, याचा निर्णय घेण्याचे सर्वाधिकार दीपक केसरकर यांना देण्यात यावेत, असा प्रस्ताव यावेळी तालुकाप्रमुख नितीन मांजरेकर यांनी मांडला. याला उपस्थित सर्वांनी मान्यता देत तसा ठराव करण्याचा निर्णय घेण्यात आला.
वेंगुर्ले पालिकेच्या २० जागांच्या निवडणुकांसाठी शहराच्या दहाही प्रभागात शिवसेनेची ताकद आहे. त्यामुळे स्वबळावर निवडणुकांना सामोरे जाण्याची आमची तयारी आहे. तरीही युतीबाबतचा निर्णय दीपक केसरकर घेतील. शहराच्या नगराध्यक्ष पदासाठी शिवसेनेतर्फे तीन प्रबळ उमेदवार निवडणूक रिंगणात उतरण्यास इच्छूक आहेत. तसेच नगरसेवक पदासाठीही २० जागांकरिता किमान ५० ते ५५ उमेदवार इच्छूक आहेत. या इच्छूक उमेदवारांचे प्रस्ताव आमदार दीपक केसरकर व जिल्हाप्रमुख संजू परब यांच्यासमोर ठेवण्यात येतील. कोणत्या प्रभागात कोण उमेदवार असेल, या निवडीचे अधिकारही आमदार केसरकर यांनाच देण्यात यावेत,असाही निर्णय या समेत घेण्यात आला.

निवडणुकांच्या पार्श्वभूमीवर आपला शिवसेना पक्ष प्रबळ बनविण्यासाठी पदाधिकारी व कार्यकर्त्यांनी काय-काय केले पाहिजे. इच्छूक उमेदवारांनी सुद्धा आपली दावेदारी प्रचळ बनविण्यासाठी काय पूर्वतयारी करायला हवी, याबाबतचे सविस्तर मार्गदर्शन सचिन वालावलकर यांनी सभेत केले. निवडणुकांचा काळ असल्यामुळे आपल्या पक्षाला कमजोर करण्यासाठी विरोधक अफवा पसरवतील. आता दक्ष होण्याचे दिवस आहेत. विरोधकांना आयतेच कोलीत मिळेल, असे कोणतेही कृत्य करू नका. उमेदवार निश्चित होईपर्यंत बंडखोरीची भाषा करू नका, केसरकर जे उमेदवार निवडतील ते निवडून येतील. यासाठी सर्वांनी १०० टक्के काम करण्याची मानसिकता तयार करा, असेही सचिन वालावलकर यावेळी म्हणाले. महिला आघाडीच्या शहरप्रमुख अॅड. श्रद्धा बाविसकर यांनी आभार मानले.