🛑एक वर्ष सोनं खरेदी करू नका पंतप्रधान मोदी यांच्या आव्हानामुळे सर्वसामान्य सोनार व्यावसायिक देशोधडीला लागेल.;काका कुडाळकर.

✒️लोकसंवाद /- सिंधुदुर्ग.

भारताचे माननीय पंतप्रधान मोदी साहेब यांनी देशाला काटकसरीचे संदेश देताना सोन्याचे दागिने जनतेने एक वर्ष खरेदी करू नये असाही सल्ला दिलेला आहे.वास्तविक पाहता सुवर्ण नियंत्रण कायद्यानंतर गेल्या काही वर्षात आलेल्या विविध बंधनामुळे सुवर्ण व्यवसाय हा सर्व सामान्य सोनारांच्या हाती राहील की नाही अशी परिस्थिती निर्माण झाली आहे. तशातच मोदी साहेबांच्या या सल्ल्यामुळे या सोनार व्यवसायाची हालत आणखीच खराब होणार आहे.

आज मोठ्या भांडवलदारांच्या कंपन्यांच्या हाती सोनार व्यवसाय जात आहे, अशी परिस्थिती निर्माण झाली आहे. आज आमच्या छोट्याशा जिल्ह्यात म्हणा किंवा तालुक्याच्या ठिकाणी म्हणा मोठमोठ्या कंपन्या आपले शोरूम उघडत आहेत. त्यामुळे छोट्या छोट्या बाजारपेठामध्ये सुद्धा स्पर्धा वाढलेली आहे. त्यातच सोन्याचा भाव गगनाला भिडल्यामुळे सर्वसामान्य ग्राहक दुरावलेलाच आहे. अशातच अशा घोषणेमुळे छोटा सुवर्ण व्यावसायिक मोठ्या अडचणीत येणार आहे. खरं म्हणजे सोन्याच्या दागिन्यांना भारतीय संस्कृतीमध्ये अनन्यसाधारण महत्त्व आहे. हिंदू धर्मात जन्म झाल्यापासून सोन परिधान केलं जातं. त्यामुळे खेडोपाड्यात सोनार व्यवसायिक 12 बलुतेदार म्हणून काम करत आहे. या अगोदरच सोन्याच्या वाढलेल्या दरामुळे व्यवसायावर परिणाम झालेलाच आहे. अशातच या आव्हानामुळे स्वर्ण व्यवसाय सोनार व्यावसायिक देशोधडीला लागतील. त्यामुळे मान. पंतप्रधान मोदी साहेब यांनी या आव्हानाचा फेरविचार करावा. अगोदरच मध्यमवर्गीय सोनार व्यावसायिक ज्या अडचणीतून जात आहे त्याला सहकार्य करण्याचे धोरण अवलंबवावे.

आज सोन्याच्या दागिन्यांच्या निर्यातीमध्ये भारताचा जगात आठवा क्रमांक लागतो. त्यामुळे लाखो सोनार कारागीर आपली रोजी रोटी कमवत आहेत. अशांवर उद्या उपासमारीची वेळ येणार आहे. मी एक सोनार समाजाचाच आहे ,अखिल भारतीय सोना हितकारणीचा कोकण विभागाचा अध्यक्षही आहे. त्यामुळे या घोषणेचा मोदी साहेबांनी पुनर्विचार करावा अन्यथा सोनार समाजामध्ये अस्वस्थता निर्माण होऊन त्यातून मोठ्या प्रमाणात असंतोष निर्माण होईल हे निश्चित.असे मत अखिल भारतीय समाज हितकारणी सभा कोकण विभाग अध्यक्ष काका कुडाळकर यांनी आपल्या प्रसिद्धी पत्रकाच्या माध्यमातून खंत वेक्त केली आहे.