🛑पुराव्याची साखळी सिद्ध करणे हे सरकारी पक्षासमोर मोठे आव्हान – अॅड. अजित भणगे.

◼️सावंतवाडी वकील संघटनेच्या ‘लेक्स डिस्कशन’ व्याख्यानमालेत नववे पुष्प संपन्न.

✒️लोकसंवाद /- सावंतवाडी.

सावंतवाडी वकील संघटनेमार्फत आयोजित “लेक्स डिस्कशन” या कायदेशीर व्याख्यानमालेचे नववे पुष्प कुडाळ येथील प्रसिद्ध विधिज्ञ अॅड. श्रीकृष्ण उर्फ अजित भणगे यांनी गुंफले. ‘परिस्थितीजन्य पुरावाः सरकारी पक्ष व बचाव पक्षाने घ्यावयाची काळजी’ या विषयावर त्यांनी उपस्थितांना सखोल मार्गदर्शन केले.

अॅड. भणगे यांनी स्पष्ट केले की, ज्या गुन्ह्यांमध्ये प्रत्यक्षदर्शी साक्षीदार नसतात, तिथे पोलिसांना परिस्थितीजन्य पुराव्याचा आधार घ्यावा लागतो. न्यायालयात दोषारोपपत्र दाखल झाल्यावर सरकारी अभियोक्त्यांची खरी कसोटी लागते. रक्ताचे डाग, न्यायवैद्यक प्रयोगशाळेचे निष्कर्ष, डी.एन.ए. अहवाल, आरोपीच्या निवेदनानुसार जप्त केलेली हत्यारे किंवा वाहने यांसारख्या प्रत्येक लहान दुव्याची साखळी जोडावी लागते. ही साखळी पूर्ण असेल तरच गुन्हा सिद्ध होतो. बचाव पक्षाने या साखळीतील कमकुवत दुवा शोधून ती कशी तोडता येईल, यावर लक्ष केंद्रित करणे आवश्यक असल्याचे त्यांनी सांगितले. “फक्त सांगाडा किंवा कवटी उपलब्ध असताना डी.एन.ए. टेस्ट किंवा ‘सुपर इंपोझिशन ऑफ स्कल’ या तंत्रज्ञानाचा वापर करून मृताची ओळख कशी पटवली जाते, हे त्यांनी विविध खटल्यांचे संदर्भ देऊन समजावून सांगितले.

अॅड. भणगे पुढे म्हणाले की, “सामान्यतः फौजदारी केस सिद्ध करण्याची जबाबदारी सरकारी पक्षाची असते. मात्र, बलात्कार किंवा पोक्सो सारख्या प्रकरणांत कायद्याने ‘अनुमान’ हे तत्त्व लागू केले आहे. अशा वेळी हा तर्क खोडून काढणे ही बचाव पक्षाची महत्त्वाची जबाबदारी असते.”

उपस्थित मान्यवर कार्यक्रमाच्या सुरुवातीला वकील संघटनेचे अध्यक्ष अॅड.बाळाजी रणशूर व अॅड. दिगंबर गावकर यांनी अॅड. भणगे यांचे स्वागत केले. यावेळी अॅड. माधवी पेंडुरकर, अॅड. धनंजय पेंडुरकर, अॅड. स्वप्नील कोरगावकर, अॅड. अलका कासकर, अॅड. अंकुश ठाकूर, अॅड. समीर वंजारी, अॅड. राहुल मडगावकर, अॅड. वामन निर्गुण, अॅड. अमेय खानविलकर, अॅड. हरी वरवडेकर यांसह अनेक वकील उपस्थित होते. कार्यक्रमाचे प्रास्ताविक श्री पंचम खेमराज विधी

महाविद्यालयाची विद्यार्थिनी कुमारी योगिनी विर्नोडकर हिने केले, तर आभार प्रदर्शन अॅड. बाळाजी रणशूर यांनी केले. या व्याख्यानमालेचा लाभ घेण्यासाठी सावंतवाडी विधी महाविद्यालय आणि डान्टस लॉ कॉलेजचे विद्यार्थी मोठ्या संख्येने उपस्थित होते. अॅड. भणगे यांनी विद्यार्थ्यांशी संवाद साधत खेळीमेळीच्या वातावरणात शंकांचे निरसन केले.