🛑राजन तेली पाठोपाठ विशाल परब यांच्या भूमिकेकडे लक्ष..

▪️सावंतवाडी विधानसभा मतदारसंघात विशाल परबांचे नाव आघाडीवर.

✍🏼लोकसंवाद /- सावंतवाडी.

भाजपचे सावंतवाडी विधानसभा प्रमुख राजन तेली यांनी भाजपला सोडचिठ्ठी देत आज शुक्रवारी ठाकरे गटात उध्दव ठाकरे यांच्या उपस्थितीत मातोश्रीवर प्रवेश केला.तर भाजपचे युवा मोर्चाचे प्रदेश उपाध्यक्ष श्री.विशाल परब हेही सावंतवाडी विधानसभेसाठी इच्छुक असून,त्यांनी गेली ३ ते ४ वर्षे मतदारसंघात फिरून भाजपचा प्रचार सुरू केला.सामाजिक जाणिवेतून मदतकार्य देखील मोठ्या प्रमाणावर केले.अनेक ठिकाणी मंदिर आदी जिर्णोद्धारसाठी निधी देखील उपलब्ध करून दिला.आपल्या दानशूरपणातून अनेकांना सतत मदतीला धावणारे युवा नेतृत्व श्री विशाल परब यांची तरुणाईत मोठी क्रेझ आहे. एवढेच नव्हे तर त्यांचा छोट्या छोट्या बच्चेकंपनीत प्रचंड फॅन फॉलोअर आहे. दिलेला शब्द पुर्ण करणारा युवा नेता अशी त्यांची ओळख असल्याने ज्येष्ठ नागरिक, शालेय विद्यार्थी, युवा वर्ग आणि तमाम मायमाऊलींमध्ये त्यांच्याबद्दल “आमचो भाव… आमचो झील” अशी एक वेगळीच आपुलकी असलेली दिसून येते.दरम्यान विशाल परब हे अपक्ष लढणार की? दुसऱ्या पक्षात प्रवेश करणार की? भाजपच्या वरिष्ठांचा आदेश आल्यानंतर भाजपमध्येच थांबणार? याकडे सर्वाचे लक्ष लागले आहे.दरम्यान विशाल परब हे अपक्ष लढणार असल्याची माहिती सुत्रांनी दिली

सावंतवाडी मतदारसंघात महायुतीकडून दिपक केसरकर यांनाच उमेदवारी जाहीर होणार हे जवळपास निश्चित झाले आहे.आता तर भाजपचे सावंतवाडी विधानसभा प्रमुख व माजी आमदार राजन तेली यांनी शुक्रवारी उध्दव ठाकरे यांच्या प्रमुख उपस्थितीत मातोश्रीवर प्रवेश केला.सावंतवाडी विधानसभा निवडणुक लढविण्यासाठी राजन तेलींना दिपक केसरकर यांच्याविरोधात उध्दव ठाकरे यांच्या शिवसेनेकडून तेलींना उमेदवारी दिली जाणार आहे.कुठूनही केसरकर यांना या निवडणुकीत पाडण्याचा विडाच ठाकरे गटाने उचलला आहे.असे जरी असले तरी राजन तेलींना कितपत यश मिळेल हे निवडणुकीनंतर कळणार आहे.

दिपक केसरकर यांनी नुकत्याच झालेल्या लोकसभेच्या निवडणुकीत नारायण राणे यांना निवडून आणण्यासाठी दिवस रात्र मेहनत घेऊन सावंतवाडी मतदारसंघात मोठे लीड दिले होते.राणे विजयी झाल्यानंतर केसरकर यांच्यावर खुश झाले.तर एकेकाळी कट्टर विरोधक असलेल्या नारायण राणेंचा प्रचार अखेर यावेळी दिपक केसरकरांना करावा लागला.

गणेश चतुर्थीच्या काळात दिपक केसरकर यांनी गणेश भक्तांच्या स्वागताचे बॅनर सावंतवाडीसह वेंगुर्ले तालुक्यात लावून त्या बॅनरवर आपल्या फोटोसोबत नारायण राणेंचा फोटो लावल्याने,मतदारसंघात जोरदार चर्चा झाली होती.आता दिपक केसरकरांसमोर विशाल परब व राजन तेली,यांच्याशी सामना करावा लागणार आहे.त्यामुळे केसरकरांना हि निवडणुक कठीण जाणार हे निश्चित.

*गोरगरिबांच्या हाकेला धावणारा विशाल परब*

श्री विशाल परब यांच्या संकल्पनेतून मागील अनेक वर्षे सातत्यपूर्वक केले जाणारे कित्येक कार्यक्रम, त्यांच्या दानशूरपणातून अनेक लोकांना झालेली मदत, गोरगरिबांची कोसळलेली घरे बांधून देण्यासाठी त्यांनी घेतलेली धाव, अनेकांच्या गंभीर आजारपणात पुढे केलेला मदतीचा हात यामुळे या युवा नेतृत्वाने एक वेगळा आदर्श समाजापुढे ठेवला आहे.विशाल परत यांच्यासारखा कर्तृत्ववान युवा चेहरा यंदा परिवर्तन घडवू शकतो अशी चर्चाही लोकांमधून होत आहे.तसेच या सावंतवाडी विधानसभा मतदारसंघात मोठमोठे मनोरंजनाचे कार्यक्रम घेतले,नौटीयाल सारख्या दिग्गज गायकाला सावंतवाडीत आणले.सिंधुदुर्गाचे पालकमंत्री रवींद्र चव्हाण यांचा वाढदिवसही करोंडो रूपये खर्च करून लोकार्पण सोहळा साजरा केला.तर दोडामार्ग येथे भटक्या गाईंसाठी गोशाळा सुरू केली, रुग्ण सेवेसाठी रुग्णवाहिका वाटप केले, आणि त्याचा गाजावाजा करताना दहा हजारांचा लवाजमा सावंतवाडीत आणत “न भूतो न भविष्यती” असा अभूतपूर्व, लोकांच्या नजरेत भरणारा लोकार्पण सोहळा केला.बचतगटाच्या बायका, अनेक लोक कार्यक्रमात आले परंतु विशाल परब एवढा खर्च करतो त्याच्या पाठीशी कोण आहे..? एवढा अवाढव्य खर्च तो कुठून करतो..? असे अनेक प्रश्न मतदारसंघातील जनतेच्या मनात उत्पन्न होऊ लागले आहेत.त्यातच विशाल परब यांना मुंबईतून धमकी आल्याची चर्चा सुरु असताना, त्यांना पोलीस संरक्षण देण्यात आले.विशाल परब अपक्ष म्हणून निवडणूक रिंगणात उतरतील अशी शक्यता आहे, मात्र आपण निवडणुक लढविणार की नाही, हे विशाल परब यांनी गुलदस्त्यात ठेवले आहे.आयत्यावेळी नेत्यांच्या छुप्या पाठिंब्यावर शक्ती प्रदर्शनाने आपला उमेदवारी अर्ज दाखल करण्याची शक्यता नाकारता येत नाही.