🛑आयुष्मान आरोग्य मंदिर,प्राथमिक आरोग्य केंद्र बांदा येथे आरोग्य कर्मचाऱ्यांसाठी सर्वसमावेशक प्रशिक्षणाचे आयोजन.

✒️लोकसंवाद /- बांदा.

आरोग्य विभाग, जिल्हा परिषद सिंधुदुर्गचे माननीय जिल्हा आरोग्य अधिकारी यांच्या मार्गदर्शक सूचनेनुसार प्राथमिक आरोग्य केंद्र बांदा येथे आरोग्य कर्मचाऱ्यांसाठी दोन दिवसीय सर्वसमावेशक प्राथमिक आरोग्य सेवा (Comprehensive Primary Health Care – CPHC) प्रशिक्षणास उत्साहपूर्ण वातावरणात प्रारंभ झाला.
या प्रशिक्षणाच्या उद्घाटनप्रसंगी सन्माननीय जिल्हा परिषद सदस्य श्री. नितीनजी राऊळ साहेब, बांदा गावच्या प्रथम नागरिक तथा सरपंच मा. सौ. प्रियांका नाईक, तालुका आरोग्य अधिकारी मा. डॉ. कर्तस्कर सर, वैद्यकीय अधिकारी डॉ. सारंग व डॉ. आव्हाड तसेच जिल्हा प्रशिक्षण पथक प्रमुख श्री. संजय नाईक (आरोग्य विभाग, जिल्हा परिषद सिंधुदुर्ग) यांची प्रमुख उपस्थिती होती.

कार्यक्रमाची सुरुवात मान्यवरांच्या हस्ते दीपप्रज्वलन करून करण्यात आली. यावेळी बांदा गावच्या सरपंच मा. सौ. प्रियांका नाईक यांनी आपल्या मनोगतात, या प्रशिक्षणातून मिळणारे ज्ञान व कौशल्य यांचा उपयोग गावातील शेवटच्या घटकापर्यंत पोहोचवून सर्वसामान्य जनतेला दर्जेदार आरोग्य सेवा देण्यासाठी करावा, असे आवाहन केले.

सन्माननीय जिल्हा परिषद सदस्य श्री. नितीन राऊळ यांनी मार्गदर्शन करताना, “आपण उभारलेला आरोग्याचा किल्ला जसा दिवसेंदिवस उंचावत व अधिक भक्कम होत आहे, त्याचप्रमाणे सर्व आरोग्य अधिकारी व कर्मचाऱ्यांनी या प्रशिक्षणाचा उपयोग करून प्राथमिक आरोग्य केंद्र बांदा कार्यक्षेत्रातील प्रत्येक नागरिकापर्यंत दर्जेदार आरोग्य सेवा पोहोचवावी,” असे प्रतिपादन केले.
या दोन दिवसीय प्रशिक्षणासाठी प्रशिक्षक म्हणून श्री. एस. एम. नाईक, श्री. डी. एम. बावडेकर, श्रीमती पी. आर. मणेरीकर, श्रीमती एस. ए. मणचेकर, श्री. एस. एम. काणेकर, श्री. एस. व्ही. कनयाळकर, श्री. एस. बी. सामंत व श्री. पी. पी. दळवी उपस्थित होते. या प्रशिक्षणाच्या माध्यमातून आरोग्य कर्मचाऱ्यांना सर्वसमावेशक प्राथमिक आरोग्य सेवा, आरोग्यविषयक विविध बाबी, सेवा गुणवत्तावाढ आणि समुदायाभिमुख आरोग्य सेवा याबाबत मार्गदर्शन करण्यात येत आहे.

कार्यक्रमाचे प्रभावी सूत्रसंचालन श्री. एस. एम. परब यांनी केले. तालुका आरोग्य अधिकारी डॉ. कर्तस्कर सर यांनी प्रास्ताविकातून प्रशिक्षणाची उद्दिष्टे व महत्त्व विशद केले. तर शेवटी जिल्हा प्रशिक्षण पथक प्रमुख श्री. संजय नाईक यांनी उपस्थित मान्यवर, प्रशिक्षक व प्रशिक्षणार्थी यांचे आभार मानले.
या प्रशिक्षणामुळे आरोग्य कर्मचाऱ्यांचे ज्ञान, कौशल्य व कार्यक्षमता वृद्धिंगत होऊन प्राथमिक आरोग्य सेवेची गुणवत्ता अधिक सक्षम होण्यास मदत होणार आहे. ग्रामीण भागातील शेवटच्या नागरिकापर्यंत सर्वसमावेशक, सुलभ व दर्जेदार आरोग्य सेवा पोहोचविण्याच्या दृष्टीने हे प्रशिक्षण महत्त्वपूर्ण ठरणार आहे.

“सक्षम आरोग्य कर्मचारी – सुदृढ गाव – निरोगी समाज”
आरोग्याचा किल्ला अधिक भक्कम करण्याच्या दिशेने बांदा आरोग्य पथकाचे आणखी एक महत्त्वपूर्ण पाऊल!