🛑पिंगुळीत बेकायदेशीर बैलांच्या झुंजीचा प्रकार;दोन्ही बैलांची झुंज थांबवून पोलिसांनी घेतले ताब्यात.

✒️लोकसंवाद /- कुडाळ.

पिंगुळी-गोंधळपूर येथील मुस्लिमवाडी परिसरात गुरुवारी (६ नोव्हेंबर) सकाळी ६.३० वाजण्याच्या सुमारास बैलांच्या झुंजीचा प्रकार उघडकीस आला.कादर शेख यांच्या घरानजीक असलेल्या मैदानावर दोन बैलांची झुंज सुरू असल्याची माहिती मिळताच पोलिसांनी घटनास्थळी धाव घेत कारवाई केली.या कारवाईमुळे परिसरात एकच खळबळ उडाली.पोलिसांना संबंधित मैदानावर गर्दी जमल्याचे निदर्शनास आले. त्यानंतर पोलिसांनी घटनास्थळी जात पाहणी केली असता दोन बैलांची झुंज सुरू असल्याचे आढळले.यावेळी पिंगुळी-गोंधळपूरचे पोलीस पाटील शंकर सातार्डेकर यांना बोलावून घेत झुंजीबाबत माहिती घेण्यात आली.

या ठिकाणी उपस्थित असलेले सुभाष मनोहर खाडे (रा. टेंबे, खाडेवाडी, जि. रत्नागिरी) यांनी एक बैल आपला असल्याचे सांगितले. गुलाब शेख यांच्या सांगण्यावरून आपण हा बैल आपल्या बोलेरो मॅक्स वाहनातून (क्र. MH 08 AP 9272) आणल्याचे त्यांनी पोलिसांना सांगितले. तर दुसरा बैल मुन्ना मुजावर (रा. दुर्गावाड, नेरूर, ता. कुडाळ) यांचा असल्याचे सुभाष खाडे यांनी सांगितले.

पोलिसांनी पाहणी केली असता एका पांढऱ्या रंगाच्या, उभ्या शिंगांच्या पाड्याच्या मानेजवळ व शिंगांजवळ झुंजीमुळे जखमा झाल्याचे दिसून आले. या बैलाची किंमत सुमारे ५० हजार रुपये असल्याचे सांगण्यात आले. दुसरा बैल पांढऱ्या-करड्या रंगाचा असून त्याच्या मानेच्या दोन्ही बाजूंना जखमा झाल्याचे आढळले.पोलिसांनी पंच व ग्रामस्थांच्या उपस्थितीत दोन्ही बैलांची झुंज थांबवून त्यांना ताब्यात घेतले. पुढील सुरक्षिततेच्या दृष्टीने दोन्ही बैलांना पोलीस ठाण्यात पाठविण्यात आले आहे.

ही कारवाई पोलीस निरीक्षक विकास बडवे यांच्या मार्गदर्शनाखाली सहाय्यक पोलीस उपनिरीक्षक कोळेकर, पोलीस हेड कॉन्स्टेबल योगेश वेंगुर्लेकर, समीर बांदेकर, महेश जळवी यांनी केली. यावेळी गोंधळपूरचे पोलीस पाटील शंकर सातार्डेकर, सतीश माडये व बाबली पिंगुळकर उपस्थित होते.