🛑सावंतवाडी बसस्टँड परिसरातील चोरीचा झाला उलगडा १२ तोळे वजनाचे दागिने गेले होते चोरीला स्थानिक गुन्हा अन्वेषणची कारवाई.

✒️लोकसंवाद /- सावंतवाडी.

सावंतवाडी बसस्थानक परिसरातील १२ तोळे वजन असलेल्या दागिन्यांच्या चोरीचा उलगडा झाला असून याप्रकरणी महिला व पुरुष अशा दोन आरोपींना ताब्यात घेण्यात आले आहे. दीपक संतोष सकट व अमृता दीपक सकट अशी त्यांची नावे असून स्थानिक गुन्हा अन्वेषणच्या सिंधुदुर्ग शाखेने ही कारवाई केली.

याबाबत सविस्तर माहिती अशी की, २१ सप्टेंबर २०२६ रोजी सावंतवाडी बस स्थानकातून तब्बल १२ तोळे दागिन्यांची चोरी झाल्याबाबतची तक्रार सावंतवाडी पोलिसात करण्यात आली होती. सदर गुन्ह्याचे समांतर तपासात CCTV फुटेज व तांत्रिक विश्लेषणवरुन सदरचा गुन्हा हा दीपक संतोष सकट, वय 27 वर्ष व अमृता दीपक सकट, वय 21 वर्ष दोन्ही रा. एस एम हायस्कूलमागे, किनई, कणकवली यांनी केले असल्याचे निष्पन्न करण्यात आले. त्याअनुषंगाने स्थानिक गुन्हे अन्वेषण शाखा सिंधुदुर्गचे पोलिस उपनिरीक्षक हाडळ व पथक यांनी नमूद पुरुष व आरोपी महिलेस शुक्रवार दिनांक ६ नोव्हेंबर २०२६ रोजी उभादेव मंदिर परिसर, गडनदी जवळ, तालुका कणकवली येथून सापळा रचून शिताफीने ताब्यात घेतले. त्यांच्याकडे सदर गुन्ह्याचे अनुषंगाने कसून चौकशी केली असता त्यांनी सदरचा गुन्हा केल्याचे कबूल केले. तसेच गुन्ह्यात चोरी केलेले १२ तोळे वजनाचे सोन्याचे दागिने हे त्यांनी कर्नाटक येथे ठेवले असल्याचे तपासात सांगितले.

सदर दोन्ही आरोपींना वैद्यकीय तपासणी करुन सावंतवाडी पोलिस ठाण्याचे ताब्यात देण्यात आलेले असून त्यांच्याकडून गुन्ह्यात चोरी केलेले सोन्याचे दागिने हस्तगत करण्यात आले.सदरची कारवाई मा. श्री. मोहन दहिकर, पोलीस अधीक्षक सिंधुदुर्ग, मा. कु. नयोमी साटम, अप्पर पोलीस अधीक्षक सिंधुदुर्ग यांच्या सुचनेनुसार पोलीस निरीक्षक श्री. प्रवीण कोल्हे यांचे मार्गदर्शनाखाली स्थानिक गुन्हे अन्वेषण शाखेचे पोलीस उपनिरीक्षक अनिल हाडळ, सहाय्यक पोलीस उपनिरीक्षक, सुरेश राठोड, WHC/रुपाली खानोलकर, H.C./ जॅकसन घोन्सलवीस, PC/अमर कांडर यांच्या पथकाने केलेली आहे.