🛑राज्यातील भजनी मंडळांना मिळणार अनुदान; सरकारचा मोठा निर्णय; ऑनलाइन अर्ज प्रक्रिया सुरू.

✒️लोकसंवाद /- मुंबई.

राज्यात देवेंद्र फडणवीसांच्या नेतृत्वाखालील महायुती सरकारने वारकरी संप्रदायासाठी मोठा निर्णय घेतला आहे. वारकरी संप्रदायाला केवळ ‘सांस्कृतिक वारसा’ न मानता, त्याला ‘संस्थात्मक बळ’ देऊन हिंदू धर्माचे रक्षण आणि संवर्धन करण्याचे धोरण स्वीकारलं आहे. त्या पार्श्वभूमीवर ‘भजनी मंडळ अनुदान योजना’ आणि ‘वारकरी संप्रदाय महामंडळ’ याची घोषणा केली आहे.

राज्यातील लोककलावंतांना प्रोत्साहन देण्यासाठी अनुदान पॅकेज अंतर्गत अनुदान दिले जात आहे. राज्याच्या सांस्कृतिक कार्य विभागाने भजनी मंडळांना अनुदान देण्याचा निर्णय घेतला आहे. सन २०२६-२७ या आर्थिक वर्षासाठी सुमारे २ हजार भजनी मंडळांकडून ऑनलाइन अर्ज मागविण्यात आले आहेत, अशी घोषणा सांस्कृतिक कार्यमंत्री आशिष शेलार यांनी आज बुधवारी केली. महाराष्ट्रातील पात्र भजनी मंडळांना या योजनेचा लाभ मिळणार आहे. अर्ज प्रक्रिया केवळ ऑनलाइन पद्धतीने mahaanudan.org या संकेतस्थळावर करण्यात येणार आहे. पात्र मंडळांची निवड ‘प्रथम अर्ज -प्रथम प्राधान्य’ या तत्त्वावर केली जाणार आहे. या योजनेसाठी ऑनलाइन अर्ज करण्याची मुदत २३ सप्टेंबर २०२६ ते २२ ऑक्टोबर २०२६ अशी आहे. पात्र भजनी मंडळांनी विहित मुदतीत ऑनलाइन अर्ज करावे लागतील.

प्रत्येक पात्र आणि नोंदणीकृत भजनी मंडळाला २५,००० रुपये इतके भांडवली अनुदान दिले जाईल. या रकमेतून मंडळांनी टाळ, मृदंग, वीणा, हार्मोनियम यांसारखी भजनासाठी आवश्यक वाद्ये आणि साहित्य खरेदी करणे अपेक्षित आहे. यामुळे भजनाची परंपरा अखंडित राहील. पहिल्या टप्प्यात राज्यातील सुमारे १,८०० ते २,००० भजनी मंडळांची निवड करण्यात आली आहे. आषाढी वारीदरम्यान पायी चालणाऱ्या वारकऱ्यांच्या सुरक्षिततेसाठी आणि अपघाती मदतीसाठी ही योजना लागू केली. आषाढी व कार्तिकी वारीसाठी पंढरपूरला जाणाऱ्या वारकरी दिंड्यांना दरवर्षी सरकारकडून सानुग्रह आर्थिक अनुदान दिले जाते. या योजनेतून आळंदी येथील ‘पूज्य सद्गुरू जोग महाराज वारकरी शिक्षण संस्था’ यांसारख्या वारकरी संप्रदायाचा प्रचार करणाऱ्या संस्थांना कीर्तन हॉल, शैक्षणिक वर्ग आणि इतर विकासाकामांमाठी निधी उपलब्ध करून दिला जातो. शासनाने ज्येष्ठ वारकऱ्यांसाठी मुख्यमंत्री वारकरी महामंडळ अंतर्गत वारकरी पेन्शन योजना सुरू केलीय. ६५ वर्षे किंवा त्याहून अधिक वय असलेल्या ज्येष्ठ वारकऱ्यांना या योजनेद्वारे दरमहा आर्थिक मदत केली जाते. आषाढी आणि कार्तिकी वारीसाठी येणाऱ्या वारकऱ्यांना विमा संरक्षण आणि सुरक्षा कवच यातून प्रदान केले जाते.