🛑एसटी प्रवासात महिलांना-ज्येष्ठांना मोठा दिलासा; कंडक्टरच करून देणार एनसीएमसी कार्डचं ‘टॉपअप’ साठी रिचार्ज.

✒️लोकसंवाद /- मुंबई.

एसटी प्रवाशांच्या मार्गातील मोठा अडथळा दूर करत राज्य रस्ते परिवहन महामंडळाने एक अत्यंत दिलासादायक निर्णय घेतला आहे. एसटीच्या सवलतीचा लाभ घेणाऱ्या प्रवाशांसाठी आता एनसीएमसी कार्डचे ‘टॉपअप’ रिचार्ज थेट एसटीच्या वाहकांकडूनच (कंडक्टर) करून घेता येणार आहे.

या नवीन सुविधेमुळे कार्डमधील बॅलन्स संपल्याने सवलतीपासून वंचित राहावे लागणे, रिचार्जसाठी डेपोंमध्ये लागणाऱ्या लांबलचक रांगा आणि प्रवाशांची होणारी धावपळ आता कायमची थांबणार आहे. महिला आणि ज्येष्ठ नागरिकांना महामंडळाच्या या निर्णयामुळे प्रचंड मोठा दिलासा मिळाला आहे. एसटी महामंडळाने 1 सप्टेंबरपासून महिला आणि 65 ते 75 या वयोगटातील ज्येष्ठ नागरिकांना एसटी प्रवासातील सवलतीचा लाभ घेण्यासाठी एनसीएमसी कार्ड अनिवार्य केले होते. मात्र, कार्डमध्ये पुरेसा बॅलन्स नसल्यास प्रवाशांना अनेक अडचणींना सामोरे जावे लागत होते. रिचार्ज करण्यासाठी डेपो किंवा संबंधित केंद्रांवर चकरा माराव्या लागत असल्याने, ऐनवेळी सवलतीऐवजी पूर्ण तिकीट काढण्याची पाळी प्रवाशांवर येत होती.

काही ठिकाणी तर सुटे पैसे नसल्याने प्रवाशांना बसमधून खाली उतरवण्याचे प्रकारही घडले होते. ही सर्व गैरसोय लक्षात घेऊन महामंडळाने आता वाहकांकडेच ‘टॉपअप’ची सुविधा सोपवली आहे. त्यामुळे प्रवास करतानाच बसमध्ये आवश्यकतेनुसार रक्कम भरता येणार असून स्वतंत्रपणे रिचार्जसाठी पळापळ करावी लागणार नाही. ऐन गणेशोत्सवाच्या काळात ही टॉपअप सुविधा सुरू झाल्यामुळे गेल्या 2 आठवड्यांपासून प्रवाशांना सहन करावा लागणारा नाहक मनस्ताप आता थांबला आहे. गणेशोत्सवात एसटी गाड्यांमध्ये प्रचंड गर्दी होते, अशा वेळी रिचार्जच्या अडचणींमुळे मोठा गोंधळ उडाला असता. मात्र, ही सोय उपलब्ध झाल्यामुळे प्रवासातील अडथळे दूर होऊन महामंडळाच्या महसुलातही मोठी वाढ होणार आहे.

वाहकांकडून मिळणाऱ्या सुविधेव्यतिरिक्त प्रवाशांना ‘भीम’ (BHIM) अॅपद्वारेही एनसीएमसी कार्ड टॉपअप करता येणार आहे. कार्डच्या मागील बाजूस दिलेल्या ‘क्यूआर’ (QR) कोडचा वापर करून ही प्रक्रिया पूर्ण करता येईल. त्यामुळे डिजिटल पेमेंट वापरणाऱ्या प्रवाशांना आता घरबसल्या कार्डमध्ये पैसे लोड करणे अधिक सोपे झाले आहे. एनसीएमसी कार्डमधील बॅलन्स संपल्यानंतर ते रिचार्ज करण्यासाठी डेपो किंवा इतर केंद्रांवर जावे लागत असल्याने प्रवाशांची मोठी गैरसोय होत होती. आता थेट वाहकांकडूनच ‘टॉपअप’ सुविधा मिळाल्याने ही धावपळ पूर्णपणे थांबेल. महिला आणि ज्येष्ठ नागरिकांना प्रवासादरम्यानच आवश्यक रक्कम भरता येणार असल्याने त्यांना सवलतीचा लाभ घेणे अधिक सुलभ होणार आहे.