🛑पर्यावरण पूरक झोया मरीन जहाज बांधणी उद्योग प्रकल्पाच्या मुहूर्तमेढी करीता स्थानिकांनाच प्राधान्य मिळावे.;मनसेची मागणी.

✒️लोकसंवाद /- सिंधुदुर्ग.

पालकमंत्री नितेश राणे यांच्या हस्ते गेल्या 15 ऑगस्टला ‘झोया मरीन प्रायव्हेट लिमिटेड’ या कंपनीच्या जहाज बांधणी प्रकल्पाचे भूमिपूजन पार पडले. सिंधुदुर्ग जिल्ह्यात प्रथमच नितेश राणे यांच्या माध्यमातून पर्यावरण पूरक असा प्रकल्प येत आहे त्याकरिता प्रथम मनसेच्या वतीने त्यांचे हार्दिक अभिनंदन आणि आभार. सदरचा प्रकल्प लवकरात लवकर पूर्ण होईल अशी अपेक्षा करताना मनसेची पालकमंत्री नितेश राणे यांच्याकडे आग्रही मागणी आहे की या जहाज बांधणी प्रकल्पाच्या माध्यमातून प्रत्यक्ष व अप्रत्यक्षरीत्या उपलब्ध होणाऱ्या रोजगारामध्ये पूर्णपणे स्थानिक युवकांनाच सामावून घ्यावे. त्याचप्रमाणे नियोजित जहाज बांधणी प्रकल्पाचे काम प्रत्यक्षात सुरू होण्यापूर्वी त्या ठिकाणी जिल्ह्यातीलच युवक युवतींना उपलब्ध होणाऱ्या या नोकरीच्या संधी कुशल उमेदवार उपलब्ध न झाल्याच्या कारणाने डावलले जाऊ नये करिता जिल्ह्यातील युवक युवतींना प्रकल्पाच्या अनुषंगाने स्केल ट्रेनिंग देखील कंपनीच्या माध्यमातून उपलब्ध करून द्यावे अशी आग्रही मागणी मनसे उपजिल्हाध्यक्ष कुणाल किनळेकर यांनी या पत्रकाद्वारे पालकमंत्री नितेश राणे यांच्याकडे केली आहे.