🛑सरंबळ इंग्लिश स्कूलचे शिष्यवृत्ती परीक्षेत घवघवीत यश.

◼️इयत्ता पाचवी व आठवी शिष्यवृत्ती परीक्षेत तीन विद्यार्थ्यांची उल्लेखनीय कामगिरी; शौर्य परब जिल्ह्यात सहावा..

✒️लोकसंवाद /- कुडाळ.

सरंबळ ग्रामस्थ समता संघ, मुंबई संचलित सरंबळ इंग्लिश स्कूल, सरंबळ या प्रशालेने महाराष्ट्र राज्य शिष्यवृत्ती परीक्षेत उल्लेखनीय यश संपादन करून आपल्या शैक्षणिक गुणवत्तेचा पुन्हा एकदा ठसा उमटविला आहे.

प्रशालेतील विद्यार्थिनी कुमारी स्वरा शेखर गावडे हिने इयत्ता पाचवी पूर्व उच्च प्राथमिक शिष्यवृत्ती परीक्षा – सन २०२६ मध्ये यश मिळवत शिष्यवृत्ती प्राप्त केली आहे.
तसेच कुमार शौर्य संतप्रसाद परब याने इयत्ता आठवी पूर्व माध्यमिक शिष्यवृत्ती परीक्षा उत्तीर्ण होत सिंधुदुर्ग जिल्ह्यात सहावा क्रमांक प्राप्त करून प्रशालेच्या शिरपेचात मानाचा तुरा खोवला आहे.
याचबरोबर कुमारी गार्गी विश्वनाथ करलकर हिनेही इयत्ता आठवी पूर्व माध्यमिक शिष्यवृत्ती परीक्षेत यश संपादन करत सिंधुदुर्ग जिल्ह्यात ६८ वा क्रमांक प्राप्त केला आहे.
या उल्लेखनीय यशाबद्दल प्रशालेचे मुख्याध्यापक श्री. अनिल सदाशिव होळकर यांनी यशस्वी विद्यार्थ्यांचे अभिनंदन करताना सांगितले, “कोणतेही यश एका दिवसात मिळत नाही. त्यामागे विद्यार्थ्यांची जिद्द, पालकांचे प्रोत्साहन आणि शिक्षकांचे सातत्यपूर्ण मार्गदर्शन असते. विद्यार्थ्यांनी हे यश सातत्यपूर्ण परिश्रम, आत्मविश्वास आणि चिकाटीच्या बळावर मिळवले असून ते इतर विद्यार्थ्यांसाठी प्रेरणादायी आहे.”
संस्थेचे सरचिटणीस श्री. राजेंद्र विश्राम परब यांनी यशस्वी विद्यार्थ्यांचे विशेष कौतुक करून त्यांच्या पुढील शैक्षणिक वाटचालीसाठी शुभेच्छा दिल्या. तसेच शाखाध्यक्ष श्री. जयप्रकाश गावडे, सर्व शिक्षक व शिक्षकेतर कर्मचारी यांनीही विद्यार्थ्यांचे अभिनंदन करून त्यांच्या उज्ज्वल भविष्यासाठी शुभेच्छा व्यक्त केल्या.

या अभिनंदन कार्यक्रमाचे सूत्रसंचालन सहाय्यक शिक्षक श्री. संदीप परब यांनी केले.
प्रशालेच्या या गौरवास्पद कामगिरीमुळे संपूर्ण सरंबळ परिसरात आनंदाचे वातावरण निर्माण झाले असून, विद्यार्थ्यांच्या उल्लेखनीय यशाबद्दल पालक, माजी विद्यार्थी आणि ग्रामस्थांकडून प्रशालेवर अभिनंदनाचा वर्षाव होत आहे. या यशामुळे सरंबळ इंग्लिश स्कूलने गुणवत्तापूर्ण शिक्षणाची परंपरा कायम राखत आणखी एक मानाचा टप्पा गाठला आहे.