🛑झाराप कुंभारवाडीत चिमुकल्यांचे ज्ञानमंदिरात पहिले पाऊल..

✒️लोकसंवाद /- कुडाळ.

खांद्यावर नवीन दप्तर, मनात कुतूहल आणि डोळ्यांत भविष्यातील रंगीत स्वप्ने घेऊन चिमुकल्यांनी ज्ञानमंदिराच्या उंबरठ्यावर पहिले पाऊल टाकले. जि.प. प्राथमिक शाळा झाराप कुंभारवाडी येथे नवागत विद्यार्थ्यांचे औक्षण, पुष्पवर्षाव आणि आनंदी स्वागत करत प्रवेशोत्सव उत्साहपूर्ण वातावरणात साजरा करण्यात आला.

शाळेच्या पहिल्याच दिवशी विद्यार्थ्यांच्या चेहऱ्यावरील निरागस हास्य आणि पालकांच्या डोळ्यांतील समाधान पाहून संपूर्ण शाळा परिसर आनंदाने फुलून गेला होता. नवागत विद्यार्थ्यांना शाळेची ओळख करून देण्यात आली तसेच त्यांच्या उज्ज्वल शैक्षणिक प्रवासासाठी शुभेच्छा देण्यात आल्या.

यावेळी शाळा व्यवस्थापन समितीच्या अध्यक्षा अन्वी हरमलकर, उपाध्यक्षा चित्रा कुडाळकर, मुख्याध्यापक शैलेंद्र न्हावेलकर, उपशिक्षक गणेश धुरी, ग्रामपंचायत सदस्या अमृता हरमलकर, विजय हरमलकर, पालक तसेच अंगणवाडी सेविका उपस्थित होत्या.
प्रवेशोत्सवानिमित्त विद्यार्थ्यांचे औक्षण करून त्यांचे प्रेमाने स्वागत करण्यात आले. शाळेबद्दल आपुलकी निर्माण व्हावी, शिक्षणाची गोडी लागावी आणि विद्यार्थ्यांचा आत्मविश्वास वाढावा या उद्देशाने विविध उपक्रमांचे आयोजन करण्यात आले. शिक्षक, पालक आणि ग्रामस्थांच्या सहभागामुळे कार्यक्रमाला विशेष रंगत आली.
चिमुकल्यांच्या आगमनाने शाळेच्या परिसरात नवचैतन्य संचारले असून नवीन शैक्षणिक वर्षाची सुरुवात उत्साह, आनंद आणि आशावादाच्या वातावरणात झाल्याचे चित्र पाहायला मिळाले.