🛑हिंदळे येथे ‘भैरव मसाला’ उद्योगाचे उद्घाटन; महिला उद्योजकतेला नवी दिशा..

✒️लोकसंवाद /- देवगड.

वनराई संस्थेमार्फत एचडीएफसी बँक परिवर्तन – सर्वांगीण ग्रामीण विकास प्रकल्पांतर्गत ग्रामीण महिलांच्या आर्थिक सक्षमीकरणासाठी व शाश्वत उपजीविकेच्या संधी निर्माण करण्याच्या उद्देशाने विविध उपजीविका विकास उपक्रम राबविण्यात येत आहेत. याच उपक्रमांतर्गत देवगड तालुक्यातील हिंदळे गावातील महिला बचत गटासाठी ‘भैरव मसाला’ निर्मिती उद्योगाची स्थापना करण्यात आली असून दिनांक ०४ जून २०२६ रोजी या उद्योगाचा उद्घाटन समारंभ उत्साहपूर्ण वातावरणात संपन्न झाला.

उद्योग स्थापनेपूर्वी बचत गटातील महिलांसाठी विविध मार्गदर्शन बैठका, उद्योजकता विकास प्रशिक्षण, मसाला निर्मितीचे व्यावसायिक प्रशिक्षण तसेच यशस्वी उद्योगांना भेटी देण्यासाठी अभ्यास दौऱ्यांचे आयोजन करण्यात आले. या माध्यमातून महिलांना उत्पादन प्रक्रिया, गुणवत्ता नियंत्रण, व्यवसाय व्यवस्थापन तसेच विक्री व बाजारपेठ व्यवस्थापनाबाबत प्रशिक्षण देऊन सक्षम करण्यात आले. त्यानंतर आवश्यक पायाभूत सुविधा व यंत्रसामग्री उपलब्ध करून देत उद्योगाची यशस्वी स्थापना करण्यात आली.

या उद्योगासाठी ड्रायर मशीन, चिली ग्राइंडिंग मशीन, चिली डंक मशीन, सेमी-ऑटोमॅटिक सीलिंग मशीन, डिजिटल वजन काटा, मोठी कढई तसेच मसाले भाजण्यासाठी आवश्यक साहित्य उपलब्ध करून देण्यात आले. या यंत्रसामग्रीमुळे उत्पादन क्षमता वाढण्यास, उत्पादनाचा दर्जा टिकवून ठेवण्यास आणि महिला बचत गटाच्या उत्पन्नवाढीस मोठी मदत होणार आहे.

उद्घाटन कार्यक्रमास हिंडळे गावचे सरपंच मा. मकरंद शिंदे, जिल्हा परिषद सदस्य मा. सुनील (भाई) पारकर, पंचायत समिती देवगडचे उपसभापती मा. अमोल लोके, उमेद अभियानाचे तालुका व्यवस्थापक मा. हेमंत हळदणकर, वित्त समन्वयक मा. समीर वळंजू, सीसी मा. प्रणव भट साळसकर, ग्रामसंघ अध्यक्षा सौ. शितल गिरकर, माजी सभापती व आंबा उत्पादक संस्थेचे अध्यक्ष मा. प्रकाश (भाऊ) राणे तसेच वनराईचे प्रादेशिक प्रकल्प व्यवस्थापक मा. ऋषिकेश दुदम यांच्यासह इतर वनराई प्रतिनिधी, विविध महिला बचत गटांच्या सदस्यांची व ग्रामस्थांची उपस्थिती लाभली.

यावेळी वनराई संस्था व एचडीएफसी बँक परिवर्तन प्रकल्पाची माहिती देण्यात आली तसेच महिला बचत गटाचा निवडीपासून उद्योग स्थापनेपर्यंतचा प्रवास उपस्थितांसमोर मांडण्यात आला. मान्यवरांनी गटाच्या प्रयत्नांचे कौतुक करून उद्योगाच्या यशस्वी वाटचालीस शुभेच्छा दिल्या. तसेच जागतिक पर्यावरण दिनाचे औचित्य साधून उपस्थित मान्यवरांच्या हस्ते वृक्षारोपण करण्यात आले. पर्यावरण संवर्धनाचा संदेश देणाऱ्या या उपक्रमास उपस्थितांनी उत्स्फूर्त प्रतिसाद दिला. हा उपक्रम ग्रामीण महिलांना स्वावलंबनाची नवी दिशा देणारा ठरत असून स्थानिक स्तरावर रोजगार निर्मिती व उद्योजकता विकासाला चालना देणारा आदर्श उपक्रम म्हणून पुढे येत आहे.
पत्ता :भैरव मसाला उद्योग, राणेवाडी (कुळाचा वड), हिंदळे, ता. देवगड, जि. सिंधुदुर्ग संपर्क :
९२०९६ २९८२४ (मानवी राणे)
८२७५७ ८२१६७ (अनुष्का राणे)