🛑पिंगुळी पाझर तलाव वाचवण्यासाठी दोन नोव्हेंबर पासून पिंगुळी ग्रामस्थांचे उपोषण.

✒️लोकसंवाद /- कुडाळ.

कुडाळ तालुक्यातील पिंगुळी देऊळवाडी येथील स.नं. २८/१ व २८/२ या भूखंडांचे तहसिलदार कुडाळ यांनी नियमबाह्य २७५ भुखंडांमध्ये केलेले अंतिम रेखांकन लेआऊट रद्द करण्याकरीता दिनांक ०२/११/२०२६ रोजी मा. उपविभागीय अधिकारी कुडाळ कार्यालयासमोर बेमुदत उपोषण करणार असल्याचे लेखी पत्र पिंगुळी जिल्हा परिषद सदस्य श्री.गंगाराम सडवेलकर यांनी देत बेमुदत उपोषण करण्याचा ईशारा दिला आहे.

तहसिलदार कुडाळ यांनी अयोग्यरित्या अंतिम रेखांकन मंजूरी दिलेली आहे.सदर अंतिम गांव मौजे पिंगुळी देऊळवाडी येथील स. नं. २८/१ व २८/२ या जमिन मिळकतीमध्ये रेखांकनचा प्रस्ताव पाहता त्यामध्ये मंडळ अधिकारी यांनी अहवाल दाखल करताना सदर सर्व्हे नंबरच्या मिळकतीस लागून तलाव असल्याचे व सदर तलाव जिल्हा परिषद सिंधुदुर्ग (ल.पा.) यांचे अखत्यारीत असल्याचे नमुद केलेले आहे. तसेच सांडपाण्याचा प्रश्न उपस्थित होण्याचा मुद्दा अहवालामध्ये नमुद केलेला आहे.सदर बाबत मा. तहसलिदार कुडाळ यांनी अंतिम रेखांकन आदेश पारीत करतेवेळी जिल्हा परिषद सिंधुदुर्ग (ल.पा) यांचा नाहरकत दाखला घेणे आवश्यक होते. परंतू तो घेण्यात आलेला नाही. त्यानंतर जिल्हा परिषद सिंधुदर्ग (ल.पा) यांनी तहसिलदार कुडाळ यांचेशी पत्रव्यवहार करुन मोजणीच्या वेळी नोटीसा न काढल्याचे कळवून रेखांकनास हरकत असल्याचे कळविलेले आहे.

तसेच सदर अंतिम रेखांकनचे वेळी नगररचनाकार सिधुदुर्ग यांचेकडून रेखांकनचा नकाशा मंजूर करण्यात आलेला नाही. त्यांचेकडे सदरचा अंतिम रेखांकनचा प्रस्ताव टिपणीकरीता पाठविण्यात देखील आलेला नाही. त्यामुळे सदरचा अंतिम रेखांकनचा आदेश हा सदोष आहे. तलावपुरनियंत्रण रेषेच्या पासून योग्य अंतर सोडून नकाशा मंजूर करुन घेणे आवश्यक आहे. परंतु सदर कामामध्ये सदर नियामाचे पालन झालेले नाही. त्यामुळे भविष्यात तलावास धोका निर्माण झालेला आहे. सदर रेखांकन परवागनीच्या आधारे बेकायदेशीररित्या होत असलेले जेसीबीच्या सहाय्याने सपाटीकरण व विनापरवाना वृक्षतोड यामुळे तलावास धोका निर्माण झालेला आहे. माती वाहून जावून तलावामध्ये भरणा झालेली आहे. तसेच सदर तलावातील पाण्याचा वापर पिंगुळी ग्रामपंचायत मार्फत सुमारे १८०० नळ धारकांना पिण्याचे पाणी म्हणून पुरविण्याकरीता होत आहे. वर नमूद केल्याप्रमाणे पाणी प्रदूषण होत असून पाणीसाठा कामी होत आहे. भविष्यातील पाणीटंचाई विचारात घेता बिल्डर मार्फत होत असलेले तलावाचे नुकसान तात्काळ थांबवणे आवश्यक झालेले आहे.

वर नमुद केल्याप्रमाणे रेखांकन मोजणीच्या वेळी सिंधुदुर्ग जिल्हा परिषद (लपा) यांना मोजणीची नोटीस नाही. त्यामुळे सदर बिल्डरने सिंधुदुर्ग जिल्हा परिषद (लपा) यांचे जमिनीमध्ये अतिक्रमण केलेले आहे. सदरे अतिक्रमण गटबुक नकाशा व अंतिम रेखांकनचा नकाशा याव्दारे स्पष्ट होणारे आहे. मंडळ अधिकारी पिंगुळी यांनी उपस्थित केलेला सांडपाण्याच्या व्यवस्थेचा प्रश्न मा. तहसीलदार कुडाळ यांच्या अंतिम रेखांकन आदेशामध्ये अनुत्तरीत आहे. त्यामुळे तलावाचे होणारे नुकसान स्पष्ट असून मा. तहसिलदार यांचा आदेश रद्द होणे आवश्यक आहे.

सदर बिल्डर जाहिरातीमध्ये सदरचा तलाव हा स्वतःच्या मालकीचा असल्याचे भासवून सदर तलावामध्ये तरंगते उपहारगृह, बोटींग आदी प्रकल्प दाखवून गैरमार्गान फायदा करुन घेत आहेत. तसेच सदर तलावाकडे जाणारे रस्त्यावर सेक्यूरीटी गार्ड बसवून ग्रामस्थांना शेतीसाठी गुरे नेण्यासाठी व घरांकडे जाणाऱ्या पुर्वपार रस्त्यांवरुन येण्याजाण्यास अटकाव करत आहे.

तरी सदर मा. तहसिलदार कुडाळ यांनी राजकीय दबावापोटी नियमबाह्य अंतिम रेखांकनची दिलेली मंजूरी तात्काळ रद्द करण्यात यावी. तसेच सदर बिल्डर शासकीय तलावाचा बेकायदेशीर वापर करत असल्याने त्याचे विरुध्द फौजदारी गुन्हा दाखल करण्यात यावा. तसे न झाल्यास आपल्या कार्यालयासमोर ग्रामस्थांना घेवून दिनांक ०२/११/२०२६ रोजी सकाळी ११ वाजल्यापासून बेमुदत उपोषण केले जाणार आहे याची नोंद घ्यावी.तसेच सदर च्या उपोषणामध्ये माजी आमदार व शिवसेना जिल्हाप्रमुख श्री. वैभव नाईक, श्री. परशुराम उपरकर माजी आमदार तसेच श्री. अमरसेन सावंत शिवसेना उपजिल्हा प्रमुख, श्री. राजन नाईक तालुकाप्रमुख शिवसेना, श्री. मंदार शिरसाट युवासेना जिल्हाध्यक्ष,जिल्हा संघटक व तालुका पदाधिकारी शिवसेना आणि ग्रामस्थ यांचे समवेत सदरचे उपोषण करणार असल्याचे जिल्हा परिषद सदस्य श्री. गंगाराम सडवेलकर यांनी सांगितले.