🛑भटक्या कुत्र्यांच्या वाढत्या दहशतीवर कठोर कायदा करा.; राजेंद्र मसूरकर यांची मागणी

◼️नागरिकांच्या सुरक्षेसाठी भटक्या कुत्र्यांची नसबंदी करावी.

✒️लोकसंवाद /- सावंतवाडी.

राज्यासह देशभरात भटक्या व मोकाट कुत्र्यांची वाढती संख्या नागरिकांच्या जीवितासाठी गंभीर धोका बनत चालली असून, या समस्येकडे लोकसभा, राज्यसभा आणि विधानसभेतील लोकप्रतिनिधींनी तातडीने गांभीर्याने लक्ष द्यावे, अशी मागणी जीवनरक्षा वैद्यकीय प्रतिष्ठानचे अध्यक्ष राजेंद्र प्रभाकर मसूरकर यांनी केली आहे. नागरिकांच्या सुरक्षेसाठी भटक्या कुत्र्यांची नसबंदी, लसीकरण आणि नियंत्रणासाठी कठोर कायदे करण्याची गरज त्यांनी अधोरेखित केली.

मसूरकर यांनी प्रसिद्धीस दिलेल्या निवेदनात म्हटले आहे की, राज्यातील अनेक भागांत भटक्या कुत्र्यांची दहशत दिवसेंदिवस वाढत असून, लहान मुले, शालेय विद्यार्थी, महिला आणि वृद्ध नागरिकांना अक्षरशः जीव मुठीत घेऊन घराबाहेर पडावे लागत आहे. सकाळ-संध्याकाळ फेरफटका मारताना नागरिकांना हातात काठी घेऊन फिरावे लागत असल्याचे भयावह चित्र निर्माण झाले आहे.

भटक्या कुत्र्यांच्या हल्ल्यांमुळे अनेक नागरिक गंभीर जखमी होत असून, काही वेळा मृत्यूच्या घटनाही घडत आहेत.वाहनचालकांनाही मोठा धोका निर्माण झाला असून, अचानक रस्त्यावर धावून येणाऱ्या कुत्र्यांमुळे अपघात होऊन अनेक जण जखमी होत असल्याचा दावा त्यांनी केला.

राजेंद्र मसूरकर यांनी सर्वोच्च न्यायालयाने भटक्या कुत्र्यांच्या नसबंदीबाबत दिलेल्या आदेशाचा उल्लेख करत, राज्य सरकारने प्रत्येक जिल्हा आणि तालुकास्तरावर विशेष मोहीम राबवावी, अशी मागणी केली.भटक्या कुत्र्यांना पकडून नसबंदी करून वन विभागाच्या लोकवस्तीपासून दूर असलेल्या जागांमध्ये सौर कुंपण घालून ठेवण्यात यावे, तसेच त्यांना शासनामार्फत अन्न व पाणी उपलब्ध करून द्यावे, असे त्यांनी सुचवले.

पाळीव कुत्र्यांबाबतही त्यांनी कठोर नियमांची मागणी केली आहे.प्रत्येक पाळीव कुत्र्याला रेबीज प्रतिबंधक लस सक्तीची करावी, कानाला ओळख बिल्ला आणि लायसन्स क्रमांक द्यावा, तसेच सार्वजनिक ठिकाणी फिरवताना पट्टा आणि तोंडाला सुरक्षा जाळी बंधनकारक करावी,असे त्यांनी नमूद केले. नियमांचे उल्लंघन करणाऱ्यांवर दंडात्मक कारवाईसह गुन्हे दाखल करण्याची मागणीही त्यांनी केली.

भटक्या कुत्र्यांच्या चाव्यानंतर लागणाऱ्या अँटी रेबीज इंजेक्शनचा सरकारी रुग्णालयांत अनेकदा तुटवडा भासत असल्याने गरीब रुग्णांना हजारो रुपये खर्च करून उपचार घ्यावे लागत असल्याचेही त्यांनी निदर्शनास आणून दिले. आर्थिक परिस्थितीमुळे काही जण गावठी उपचारांकडे वळतात आणि त्यामुळे रेबीजसारख्या आजारामुळे मृत्यू ओढवतात, अशी खंत त्यांनी व्यक्त केली.

“लोकप्रतिनिधींना स्वतःला या समस्येचा सामना करावा लागत नसल्याने हा प्रश्न गांभीर्याने घेतला जात नाही. मात्र सर्वसामान्य जनतेचे जीवन धोक्यात आले आहे. त्यामुळे आगामी अधिवेशनात हा प्रश्न प्राधान्याने मांडून ठोस निर्णय घेण्यात यावा,” अशी आर्त मागणी राजेंद्र मसूरकर यांनी केली आहे.