🛑झारापमध्ये अनधिकृत बांधकामांचा धुमाकूळ; वरदहस्त कोणाचा?”

✒️लोकसंवाद /- समिल जळवी,कुडाळ.

पावसाळ्यात नागरिकांच्या घरात पाणी शिरून संसार उद्ध्वस्त होत असतानाही झारापमधील महामार्गालगतची अनधिकृत बांधकामे हटविण्यास महामार्ग विभाग तयार नसल्याने संतापाची लाट उसळली आहे. नाले बंद,पाण्याचा नैसर्गिक प्रवाह रोखला गेलेला आणि रस्त्यालगत वाढलेले अतिक्रमण यामुळे दरवर्षी नागरिकांना पूरसदृश्य परिस्थितीचा सामना करावा लागत आहे. मात्र सामान्यांच्या जीविताचा प्रश्न निर्माण झाला तरी संबंधित विभाग कारवाई करण्याऐवजी नेमके कोणाला पाठीशी घालत आहेत,असा संतप्त सवाल आता झारापमध्ये उघडपणे विचारला जात आहे.

मुंबई-गोवा महामार्गालगत झाराप परिसरात दिवसेंदिवस वाढत चाललेल्या अनधिकृत बांधकामांमुळे नागरिकांमध्ये तीव्र नाराजी निर्माण झाली आहे.महामार्गाच्या कडेला, सेवा रस्त्यालगत आणि काही ठिकाणी थेट सार्वजनिक जागांवर सुरू असलेल्या बांधकामांकडे संबंधित यंत्रणांचे जाणीवपूर्वक दुर्लक्ष होत असल्याचा आरोप नागरिकांकडून केला जात आहे.विशेष म्हणजे, काही बांधकामे रात्रीच्या वेळी वेगाने उभी राहत आहेत, तर काही ठिकाणी परवानगी, नकाशा मंजुरी,बांधकाम परवाना किंवा जमीन वापर बदलाची प्रक्रिया पूर्ण झाली आहे का, याबाबत कोणतीही स्पष्ट माहिती उपलब्ध नाही. तरीही ही कामे बिनधास्त सुरू असल्याने “नेमकं कोणाच्या आशीर्वादाने हा प्रकार सुरू आहे?” असा प्रश्न स्थानिक उपस्थित करत आहेत.महामार्ग हा राष्ट्रीय महत्त्वाचा प्रकल्प असताना रस्त्यालगत होणारी अनधिकृत बांधकामे भविष्यात वाहतूक सुरक्षेसाठी मोठा धोका ठरू शकतात. अनेक ठिकाणी पार्किंग, अतिक्रमण, लोखंडी शेड, दुकाने आणि जाहिरात फलकांमुळे वाहनचालकांची दृश्य मर्यादा कमी होत असल्याचे नागरिकांचे म्हणणे आहे. पावसाळ्यात या बांधकामांमुळे पाण्याचा निचरा अडत असून त्याचा फटका थेट सामान्य कुटुंबांना बसत आहे.
स्थानिकांच्या मते, सामान्य नागरिकाने लहान बांधकाम केले तरी तत्काळ नोटीस बजावली जाते; मात्र महामार्गालगत मोठमोठी बांधकामे उभी राहत असताना प्रशासन गप्प का? हा प्रश्न आता चर्चेचा विषय बनला आहे. काही ठिकाणी महसूल, ग्रामपंचायत, बांधकाम विभाग आणि महामार्ग प्रशासन यांच्यात जबाबदारी ढकलण्याचा प्रकार सुरू असल्याचाही आरोप होत आहे.
नागरिकांनी आता संबंधित विभागांकडून खालील मुद्द्यांवर खुलासा करण्याची मागणी केली आहे :
संबंधित बांधकामांना अधिकृत परवानगी आहे का?
बांधकाम नकाशे मंजूर झाले आहेत का?
राष्ट्रीय महामार्गाच्या नियमांचे पालन झाले आहे का?
नाले व पाण्याचा प्रवाह अडविणाऱ्यांवर कारवाई का होत नाही?
अतिक्रमण आणि सुरक्षा तपासणी कोणी केली?
अनधिकृत बांधकामांवर कारवाई का होत नाही?
“महामार्ग विकासाच्या नावाखाली काही जणांचा ‘व्यवसाय’ आणि सामान्य नागरिकांचा जीव धोक्यात घालण्याचा प्रकार सुरू आहे का?” असा संतप्त सवाल आता झारापमध्ये जोर धरू लागला आहे.
प्रशासनाने तात्काळ संयुक्त पाहणी करून अनधिकृत बांधकामांवर कारवाई करावी, अन्यथा नागरिक आंदोलनाचा मार्ग स्वीकारतील, असा इशाराही स्थानिकांकडून देण्यात येत आहे.