🛑“ग्रामपंचायतीत चोरी, CCTV मध्ये चोर कैद तरीही गुन्हा नाही नानेलीमध्ये नेमकं कोणाला संरक्षण?”

✒️लोकसंवाद /- कुडाळ.

नानेली ग्रामपंचायत कार्यालयात झालेल्या चोरीच्या प्रकरणाने आता संपूर्ण तालुक्यात खळबळ उडवली असून, CCTV फुटेजमध्ये संशयित व्यक्ती कैद झाल्याचा दावा असतानाही अद्याप गुन्हा दाखल न झाल्याने प्रशासन आणि पोलीस यंत्रणेवर गंभीर प्रश्न उपस्थित होत आहेत. “सामान्य माणसाच्या घरात चोरी झाली असती तर पोलिसांनी आतापर्यंत आरोपीला उचललं असतं; मग ग्रामपंचायतीतील चोरीप्रकरणात एवढं मौन का?” असा संतप्त सवाल नागरिकांकडून उपस्थित केला जात आहे.
नानेली ग्रामपंचायतीचे उपसरपंच प्रज्ञेश धुरी यांनी गटविकास अधिकाऱ्यांकडे दिलेल्या लेखी निवेदनात अनेक धक्कादायक बाबी समोर आणल्या आहेत. 8 एप्रिल 2026 रोजी ग्रामपंचायत कार्यालयात चोरी झाली असून, हा संपूर्ण प्रकार CCTV मध्ये कैद झाल्याचे नमूद करण्यात आले आहे. मात्र एवढे पुरावे उपलब्ध असतानाही संबंधितांवर गुन्हा दाखल न होणे हेच संशयाला खतपाणी घालणारे ठरत आहे.
याहून धक्कादायक बाब म्हणजे,उपसरपंच स्वतः पोलीस ठाण्यात तक्रार नोंदवण्यासाठी गेले असता “उपसरपंच गुन्हा दाखल करू शकत नाही” असे सांगण्यात आल्याचा गंभीर आरोप निवेदनात करण्यात आला आहे.त्यामुळे आता “चोरीपेक्षा मोठा प्रकार म्हणजे आरोपीला वाचवण्याचा प्रयत्न तर सुरू नाही ना?” अशी जोरदार चर्चा रंगू लागली आहे.

ग्रामस्थांनीही प्रशासनावर संताप व्यक्त करत, “सरकारी कार्यालयात चोरी होते, CCTV पुरावे मिळतात, तरी कारवाई होत नाही; मग सामान्य जनतेने न्याय कोणाकडे मागायचा?” असा सवाल केला आहे. काही नागरिकांनी तर “कायद्याचा धाक संपला की चोरी करणाऱ्यांचे मनोबल वाढते,” असा इशाराही दिला आहे.या प्रकरणात तात्काळ गुन्हा दाखल करून निष्पक्ष चौकशी झाली नाही तर भविष्यात आणखी गंभीर घटना घडू शकतात, अशी भीती व्यक्त केली जात आहे. दरम्यान, नानेली ग्रामपंचायत प्रशासन, स्थानिक पोलीस आणि संबंधित अधिकाऱ्यांच्या भूमिकेबाबत आता संशयाचे सावट निर्माण झाले असून,“चोर CCTV मध्ये कैद… पण कारवाई मात्र गायब अशी चर्चा संपूर्ण परिसरात रंगू लागली आहे.