🛑सावंतवाडी पालिकेचे क्रीडा संकुल अत्याधुनिक होणार आमदार दीपक केसरकर यांची माहिती..

✒️लोकसंवाद /- सावंतवाडी.

सावंतवाडी येथील पालिकेच्या माध्यमातून नव्याने होणाऱ्या क्रीडा संकुलात आता इनडोअर व आउटडोर खेळांसाठी सात कोटी रुपये अधिकचे मंजूर झाले आहेत. यात सेमी ऑलिम्पिक ट्रॅक, अॅथलेटिक्स मैदान, रमाकांत आचरेकर यांच्या नावाने उभारलेली क्रिकेटची ड्रेसिंग रूम यांचा समावेश असणार आहे. त्याचबरोबर कबड्डी, खो-खो, व्हॉलीबॉल, फुटबॉल अशा खेळाडूंना खेळता यावे यासाठी सुद्धा आवश्यक सुविधा उपलब्ध करून देण्यात येणार आहे, अशी माहिती आज येथे आयोजित पत्रकार परिषदेत आमदार दीपक केसरकर यांनी दिली. तसेच स्विमिंग पूल सुद्धा सुरू करण्यात येणार आहे. असे त्यांनी सांगितले. श्री. केसरकर यांनी क्रीडा संकुलाच्या जागेची पालिकेच्या पदाधिकाऱ्यांसह पाहणी केली. त्यानंतर ते पत्रकार परिषदेत बोलत होते.

यावेळी लखमराजे भोंसले, आरोग्य व क्रीडा सभापती सुधीर आडीवरेकर, पाणीपुरवठा सभापती प्रतीक बांदेकर, उद्यान सभापती मोहिनी मडगावकर, आनंद नेवगी, सुनिता पेडणेकर, सार्वजनिक बांधकाम अभियंता पूजा इंगवले, जिल्हा क्रीडा अधिकारी विजय शिंदे, नगरपरिषदेचे अभियंता तुषार सरडे, उपअभियंता सीमा गोवेकर, अर्चित पोकळे आणि प्रसाद नार्वेकर आदी मान्यवर उपस्थित होते.

यावेळी केसरकरांनी उपस्थित अधिकाऱ्यांकडून आढावा घेतला. पावसाळ्यापूर्वी हे काम पूर्ण करण्याचा आपला मानस असल्याचे केसरकर यांनी सांगितले. वेंगुर्ला आणि बांद्याला अतिरिक्त जागेची मागणी केली असून दोडामार्गमध्येही क्रीडा संकुलासाठी आपण प्रयत्नशील असल्याचे त्यांनी स्पष्ट केले. मुलांमध्ये खेळाची आवड निर्माण करण्यासाठी नगरपरिषदेच्या माध्यमातून हे परिपूर्ण संकुल उभे केले जात आहे, असे केसरकर म्हणाले.