🛑कोलगाव येथे थांबलेल्या दुचाकीला ट्रकची धडक तिघे जखमी..

✒️लोकसंवाद /- सावंतवाडी.

थांबलेल्या दुचाकीला भरधाव ट्रकने धडक दिल्यामुळे कोलगाव येथे झालेल्या अपघातात १५ वर्षाच्या मुलीसह तिघेजण गंभीर जखमी झाले आहेत. ही घटना रात्री साडेअकरा वाजण्याच्या सुमारास बेळगाव- वेंगुर्ला मार्गावर रील स्टार कलाकार मलिक मकानदार यांच्या घरासमोर घडली. हा सर्व थरारक प्रकार सीसीटीव्ही मध्ये कैद झाला आहे. दरम्यान जखमींना अधिक उपचारासाठी येथील कुटीर रुग्णालय दाखल करण्यात आले आहे. त्यांची प्रकृती स्थिर आहे. या अपघातात गाडीचे मोठ्या प्रमाणात नुकसान झाले.

रमजान शेख (वय ५०), हसीना शेख (वय ४५) आणी सिमरन शेख (वय १५) सर्व रा. कोलगाव अशी जखमींची नावे आहेत. याबाबत अधिक माहिती अशी की, कोलगाव येथे राहणारे शेख कुटुंब आपल्या घरी परतत होते. यावेळी ते मकानदार यांच्या घरासमोर काही वेळ थांबले असता यावेळी मागून भरधाव वेगाने येणाऱ्या ट्रक चालकाने त्यांच्या दुचाकीला जोरदार धडक दिली. ही धडक इतकी जबरदस्त होती की तिघेही गाडीवरून फेकले गेले. सुदैवाने रस्त्याच्या बाजूला ते पडल्यामुळे कोणतीही दुर्दैवी घटना घडली नाही. या अपघातात दुचाकीचे मोठे नुकसान झाले आहे. हा सर्व प्रकार सीसीटीव्ही मध्ये कैद झाला आहे. दरम्यान अपघातात जखमी झालेल्या तिघांनाही खाजगी गाडीने येथील कुटीर रुग्णालयात दाखल करण्यात आले.