🛑तंत्रशिक्षण विभागांतर्गत अभ्यासक्रम प्रवेशासाठी सुधारित वेळापत्रक जाहीर.

✍🏼लोकसंवाद /- कणकवली.

सर्वोच्च न्यायालयाच्या आदेशानुसार अखिल भारतीय तंत्रशिक्षण परिषद, नवी दिल्ली (एआयसीटीई) या शिखर परिषदेद्वारे शैक्षणिक वर्ष २०२४-२५ साठी सुधारित वेळापत्रक घोषित केले आहे. सुधारित वेळापत्रकानुसार रिक्त जागांसाठी प्रवेश घेण्याची अंतिम तारीख २३ ऑक्टोबर आहे. वास्तुकला परिषदेनेही सुधारित वेळापत्रक घोषित केली आहे. त्यानुसार बी. आर्च, एम. आर्च या अभ्यासक्रमांच्या रिक्त जागांसाठी प्रवेश घेण्याची अंतिम तारीख २१ ऑक्टोबर आहे. शैक्षणिक वर्ष २०२४-२५ साठी तंत्रशिक्षण विभागांतर्गत असलेल्या विविध व्यावसायिक पदवी व पदव्युत्तर पदवी अभ्यासक्रम राबविणाऱ्या राज्यातील शासकीय, शासकीय अनुदानित, विद्यापीठ संचलित व खासगी विनाअनुदानित शैक्षणिक संस्थांच्या प्रथम आणि द्वितीय वर्षाच्या अभ्यासक्रमांच्या कॅपनंतर रिक्त राहिलेल्या जागा व संस्थास्तरावरील कोट्यातील रिक्त जागांच्या प्रवेश प्रक्रियेकरिता नॉन कॅप नोंदणी प्रक्रिया व प्रवेश प्रक्रिया पुन्हा सुरू करण्यात येत आहे. कॅपनंतर रिक्त राहिलेल्या जागा व संस्थास्तरावरील रिक्त जागांकरिता प्रवेश घेण्यास इच्छुक उमेदवारांना ई-स्कुटिनी पद्धत किंवा प्रत्यक्ष पडताळणी स्कुटिनी पद्धत याद्वारे नोंदणी, कागदपत्रांची पडताळणी व अर्ज भरल्याची निश्चिती करणे आवश्यक आहे. अशा उमेदवारांनी प्रवेशांसाठी संस्थेत स्वतंत्रपणे अर्ज करणे आवश्यक आहे. प्रवेशासाठी पात्रता, नियम व माहिती पुस्तिका संकेतस्थळावर उपलब्ध असून अधिक माहितीसाठी www.mahacet.org या संकेतस्थळावर भेट द्यावी, असे आवाहन करण्यात आले आहे.