🛑आतिशी मार्लेना यांनी घेतली दिल्लीच्या मुख्यमंत्रीपदाची शपथ.

✍🏼लोकसंवाद /- नवी दिल्ली.

आदमी पक्षाच्या नेत्या आतिशी मार्लेना यांनी शनिवारी दिल्लीच्या मुख्यमंत्रिपदाची शपथ घेतली आहे. दिल्लीचे उपराज्यपाल व्ही. के. सक्सेना यांनी त्यांना पद आणि गोपनियतेची शपथ दिली. मुख्यमंत्रीपदाची शपथ घेताच आतिशी यांनी नवा रेकॉर्ड केला आहे. ४३ वर्षांच्या आतिशी दिल्लीच्या इतिहासातील सर्वात तरुण मुख्यमंत्री आहेत. त्या दिल्लीच्या तिसऱ्या महिला मुख्यमंत्री आहेत. शपथविधी कार्यक्रमाला माजी मुख्यमंत्री अरविंद केजरीवाल यांच्यासह आम आदमी पक्षाचे प्रमुख नेते उपस्थित होते.

आतिशींसोबत पाच मंत्र्यांनीही यावेळी शपथ घेतली. सौरभ भारद्वाज, कैलाश गहलोत, गोपाल राय, इमरान हुसैन आणि मुकेश अहलावत यांनी मंत्रिपदाची शपथ घेतली. नव्या सरकारमध्ये मुकेश अहलावत हा एकमेव नवा चेहरा आहे. मुकेश अहलावत २०२० साली पहिल्यांदा आमदार झाले आहेत. ते सुल्तानपूर माजराचे आमदार आहेत. अहलावत उत्तर पश्चिम दिल्लीमधील पक्षाचा दलित चेहरा आहे. सौरभ भारद्वाज, कैलाश गहलोत, गोपाल राय, इमरान हुसैन हे सर्वजण यापूर्वी अरविंद केजरीवाल यांच्या मंत्रिमंडळात मंत्री होते.

अरविंद केजरीवाल यांनी आपल्या मुख्यमंत्रीपदाचा राजीनामा दिल्यानंतर आतिशी यांनी आज दिल्लीचे सुत्रे हाती घेतली आहेत. मद्यधोरण घोटाळ्यात अरविंद केजरीवाल यांच्यावर अटकेची कारवाई झाल्यानंतर, सरकार बरखास्त करण्याची मागणी भाजपकडून करण्यात येत होती. त्यामुळे, अरविंद केजरीवाल यांनी जामीनावर मुक्तता होताच, आपल्या मुख्यमंत्रीपदाचा राजीनामा दिली. तसेच, दिल्लीच्या मुख्यमंत्रीपदावर आतिशी मार्लेना यांची निवड केली आहे. त्यामुळेच, आतिशी यांनी मुख्यमंत्रीपदाची शपथ घेतल्यानंतर माजी मुख्यमंत्री व आपचे सर्वेसर्वा अरविंद केजरीवाल यांनी आतिशी यांचे अभिनंदन केले. त्यावेळी, मुख्यमंत्री आतिशी यांनी अरविंद केजरीवाल यांचा पाया पडून आशीर्वाद घेतले.