🛑१५ सप्टेंबर अभियंता दिन विशेष !

✍🏼लोकसंवाद /- सिंधुदुर्ग.

दरवर्षी १५ सप्टेंबर हा भारतात अभियंता दिन (Engineer’s Day) म्हणून साजरा केला जातो. याच दिवशी भारताचे महान अभियंता आणि भारतरत्न मोक्षगुंडम विश्वेश्वरय्या यांचा वाढदिवस असतो. त्यांनी आधुनिक भारताची निर्मिती केली आणि देशाला नवे रूप दिले. त्यांनी अभियांत्रिकी क्षेत्रात असाधारण योगदान दिले. देशभरात बांधलेल्या अनेक नद्यांची धरणे आणि पूल यशस्वी करण्यात त्यांचा मोठा हात आहे. त्यांच्यामुळे देशातील पाण्याचा प्रश्न सुटला. ज्यात म्हैसूर मधील कृष्णराज सागर धरण, पुण्यात खडकवासला जलाशय आणि ग्वाल्हेर मधील तिग्रा धरण यांचा समावेश आहे. एवढेच नाही तर हैदराबाद शहर बनवण्याचे संपूर्ण श्रेय हे त्यांना जाते. त्यांनी तेथे पूर संरक्षण प्रणालीची रचना केली, त्यानंतर ते संपूर्ण भारतात प्रसिद्ध झाले. विश्वेश्वरय्या यांना आधुनिक म्हैसूर राज्याचे जनक असेही म्हटले गेले. त्यांनी म्हैसूर सरकार सोबत अनेक कारखाने आणि शैक्षणिक संस्था स्थापन केल्या होत्या, विशेषतः म्हैसूर साबण कारखाना, म्हैसूर लोह आणि स्टील कारखाना, स्टेट बँक ऑफ म्हैसूर, म्हैसूर चेंबर्स ऑफ कॉमर्स आणि विश्वेश्वरय्या अभियांत्रिकी महाविद्यालय शैक्षणिक संस्था स्थापन केल्या होत्या.