🛑आतल्या गोटातील स्फोटक वृत्त,मंत्री रविंद्र चव्हाण यांची लॉटरी लागणार ?

लोकसंवाद /- मुंबई.

रत्नागिरी-सिंधुदुर्ग लोकसभा मतदारसंघांत महायुतीचा उमेदवार निवडीबाबत मोठी अपडेट समोर येत असून आज सायंकाळी मोठी राजकीय समिकरणे जुळवुन आणण्याचा प्रयत्न युद्धपातळीवर सुरु झाला आहे. कोणत्याही स्थितीत रविवारपर्यंत उमेदवार निवडीचा मुहूर्त गाठायचा असा प्रयत्न केला जात आहे. आज सायंकाळी हाती आलेल्या खासगी गोटातील वृत्तानुसार बांधकाम मंत्री रविंद्र चव्हाण यांची उमेदवार म्हणून लॉटरी लागू शकते, असे खासगी गोटातील वृत्त आहे. उपमुख्यमंत्री देवेंद्र फडणविस हे स्वत: चव्हाण यांच्यासाठी आग्रही असल्याचेही समजते.

दरम्यान गुरुवारी मुख्यमंत्री एकनाथ शिंदे यांनी उद्योजक किरण सामंत यांना तातडीने मुंबईला बोलावून घेतले होते. मात्र दोन दिवस मुख्यमंत्री सक्रिय असल्याने सामंत यांना प्रतिक्षेत रहावे लागले, असे त्यांच्या खास गोटातील कार्यकर्त्यांकडून समजते. त्यानंतर गुरुवार मध्यरात्री चव्हाण यांच्या बंगल्यावर बांधकाम मंत्री रविंद्र चव्हाण, उद्योगमंत्री उदय सामंत, उद्योजक किरण सामंत यांच्यात अत्यंत खासगी अशी बैठक झाल्याचे वृत्त आहे. या बैठकीत रविंद्र चव्हाण यांना उमेदवारी देण्याबाबत सहविचार झाला असून चव्हाण यांची लॉटरी फुटणार असे म्हटले जात आहे. तरीही पालकमंत्री उदय सामंत हे शिवसेनेला जागा मिळावी यासाठी आपल्या आग्रहावर ठांम आहेत. तर किरण सामंत यांनी समझोत्याची भुमिका घेतल्याचेही समजते. अर्थात या सार्‍या राजकीय चर्चांना रविवारी बे्रक लागेल का ? अशी अपेक्षा कार्यकत्यामधुन व्यक्त केली जात आहे.