🛑चौकुळ गावात कबुलायतदार जमिन वाटपा संदर्भात काही गैरसमज झाल्याचे निदर्शनास आल्याने खुलासा.;आमदार दीपक केसरकर

✒️लोकसंवाद /- सावंतवाडी.

दिनांक १६ रोजी चौकुळला ग्रामस्थांची बैठक आहे.परंतु त्याच दिवशी कबुलायतदार गांवकर सदरातील जमिन वर्ग १ ने देण्यासंबंधात मी माननिय महसुल मंत्री यांना दिलेल्या निवेदना संदर्भात मुंबई येथे बैठक आयोजित करण्यात आली असल्याने चौकुळ येथे उपस्थित राहू शकत नाही याबद्दल दिलगीर आहे.आंबोली व चौकुळ येथील कबुलायतदार गावकर व नंतर महाराष्ट्र शासनाचे नावे असलेल्या जमिनीची मोजणी जिल्हा निबंधकाच्यावतीने सुयश सर्वेअर एजन्सीकडे सोपवीण्यात आली आहे. त्यापैकी चौकुळची ७०% मोजणी पुर्ण झाली असून उर्वरीत मोजणी एक महिन्यात पूर्ण होईल. त्यानंतर आंबोलीचे मोजणीचे काम एक महीन्यात पुर्ण होईल. मोजणीस पावसामुळे व डोंगराळ व जंगलयुक्त भाग असल्याने उशीर झाला आहे.

हे काम लवकरात लवकर पूर्ण करायचा शासनाचा प्रयत्न आहे. कबुलायदार गावकर जमिनीचे वाटप वनक्षेत्र लागलेल्या जमिनीचे क्षेत्र वनातून वगळून दोन्हीचे वाटप एकाच वेळी व्हावे ही आंबोली व चौकूळ गावची मागणी शासनाने मान्य केली असून त्याप्रमाणे वनक्षेत्र वगळण्याचा निर्णय शासनाने केला असला तरी वनखात्याने महाराष्ट्र महसूल न्यायाधिकरणाकडे अपील केल्याने सदर बाब प्रलंबीत आहे.

अपीलाचा निर्णय लवकरात लवकर करुन घेण्याचा महसूल विभागाचा प्रयत्न आहे.चौकुळ गावची कुटुंब संख्या निश्चित करणे, आणेवारीनुसार जमिन वाटप करणे, कबुलायतदार गावक-याचे हक्क अबाधीत ठेवणे हे सर्व अधिकार शासनाने चौकूळ गावच्या ६५ सदस्य समितीला दि. २० सप्टेंबर २०२४ च्या पत्राने दिले आहेत. चौकुळ गावचे जमिनीचे वाटप सर्वांना सम प्रमाणात करावे का? याचा निर्णयही चौकुळ ग्रामस्थांनी घ्यावयाचा आहे. सर्व अधिकार चौकुळ गावाला दिले असल्याने याबाबत मनात कोणतीही शंका न बाळगता आवश्यक निर्णय ग्रामस्थांनी व समितीने लवकरात लवकर घ्यावे ही विनंती आहे.

जमिनी वर्ग १ ने वाटप करावी ही आपली मागणीही मी शासनापर्यंत पोहचवीली आहे. या संदर्भात महसूल मंत्री महोदयांच्या बैठकीत मी याबाबीचा पाठपुरावा करेन.

चौकुळ, आंबोली, गेळे गावांना जमिनीचे वाटप करत असताना शासनाच्या जमिनीच्या वाटपा संदर्भात असलेल्या १३ अटी शासनाने विशेष बाब म्हणून शिथिल केल्या आहेत.त्यामुळे सर्व जमिनीचे वाटप ग्रामस्थांना समान प्रमाणात करणे शक्य झाले आहे. तरी याचा लाभ ग्रामस्थांनी घ्यावा अशी विनंती आहे.

चौकुळ गावाचा सर्वांगीण विकास व्हावा यासाठी मी नेहमीच प्रयत्नशिल राहीन. आपण जे जे विषय माझ्या निदर्शनास आणले त्याचा पाठपुरावा केला जाईल याची मी खात्री देतो. असे आमदार दीपक केसरकर यांनी आपल्या प्रसिद्धी पत्रकाच्या माध्यमातून सांगितले.