🛑सावंतवाडी येथे भू प्रणाम केंद्राचे पालकमंत्री नितेश राणे यांच्या हस्ते उद्घाटन.

◼️भूमी अभिलेख व महसूल सेवा अधिक गतीमान आणि पारदर्शक होणार.

✒️लोकसंवाद /- सावंतवाडी.

नागरिकांना भूमी अभिलेख आणि महसूल विभागाशी संबंधित सेवा अधिक जलद, सुलभ आणि पारदर्शक पद्धतीने उपलब्ध व्हाव्यात, या उद्देशाने सावंतवाडी येथील उपअधीक्षक भूमी अभिलेख कार्यालयात सुरू करण्यात आलेल्या ‘भू प्रणाम केंद्रा’चे उद्घाटन राज्याचे मत्स्यव्यवसाय व बंदरे विकास मंत्री तथा जिल्ह्याचे पालकमंत्री नितेश राणे यांच्या हस्ते संपन्न झाले.

तहसीलदार कार्यालयाच्या आवारातील उपअधीक्षक भूमी अभिलेख कार्यालयात हा उद्घाटन सोहळा पार पडला. ‘भूमीचा सन्मान, देशाचा अभिमान’ हे ब्रीद घेऊन हे केंद्र कार्यान्वित करण्यात आले आहे.

याप्रसंगी आमदार दीपक केसरकर, जिल्हा परिषद अध्यक्ष प्रमोद कामत, जिल्हा मध्यवर्ती बँकेचे अध्यक्ष मनीष दळवी, सावंतवाडी नगरपरिषदेच्या नगराध्यक्षा श्रद्धाराजे भोंसले, उपनगराध्यक्ष ॲड. अनिल निरवडेकर, भूमी अभिलेख विभागाचे प्रभारी जिल्हा अधीक्षक अनुप जावळे, सावंतवाडीचे उपविभागीय अधिकारी विरसिंग वसावे, भूमी अभिलेखचे उपअधीक्षक विनायक ठाकरे आदी मान्यवर उपस्थित होते.

या भू प्रणाम केंद्रामुळे सावंतवाडी तालुक्यातील नागरिकांना जमिनीच्या मोजणीसह भूमी अभिलेख व महसूल विभागाशी संबंधित विविध सेवा एकाच छताखाली आणि तंत्रज्ञानाच्या आधारे विहित वेळेत मिळणे शक्य होणार आहे. शासकीय कामांमध्ये आधुनिक तंत्रज्ञानाचा वापर वाढवून पारदर्शकता आणण्याच्या दृष्टीने हे केंद्र उपयुक्त ठरेल, असा विश्वास यावेळी व्यक्त करण्यात आला. कार्यक्रमाला विविध पदाधिकारी, शासकीय अधिकारी, कर्मचारी आणि स्थानिक नागरिक मोठ्या संख्येने उपस्थित होते.