🛑ओबीसी समाजातील शेवटच्या घटकापर्यंत शासकीय योजनांचा लाभ पोहोचविणार.;उदयसिंह गायकवाड.

✒️लोकसंवाद /- ओरोस.

इतर मागास बहुजन कल्याण विभागामार्फत राबविण्यात येणाऱ्या विविध शासकीय योजनांचा लाभओबीसी समाजातील शेवटच्या घटकापर्यंत पोहोचविण्यासाठी प्रभावीपणे काम करण्यात येईल, असा निर्धार इतर मागास बहुजन कल्याण विभागाचे सहाय्यक संचालक उदयसिंह गायकवाड यांनी व्यक्त केला.इतर मागास बहुजन कल्याण विभाग, सिंधुदुर्ग यांच्यावतीने तसेच ओबीसी व आरक्षित महासंघ सिंधुदुर्ग यांच्या सहकार्याने बुधवारी (१९ ऑगस्ट) विभागाच्या कार्यालयात ओबीसी समाजातील विविध प्रवर्गांच्या पदाधिकारी व कार्यकर्त्यांसाठी शासकीय योजनांची माहिती देणारे विशेष शिबिर आयोजित करण्यात आले होते. यावेळी गायकवाड बोलत होते.

शिबिराला ओबीसी व आरक्षित महासंघाचे जिल्हाध्यक्ष नितीन वाळके,जिल्हा परिषदेचे माजी अध्यक्ष काका कुडाळकर,ओबीसी नेते श्री.सुनिल भोगटे,समता कल्याण निरीक्षक गणेश हुकीरे,शामराव पेजे महामंडळाच्या जिल्हा व्यवस्थापक प्रीती पटेल,महात्मा फुले मागासवर्गीय विकास महामंडळाच्या वर्षा कासले, महाराष्ट्र राज्य दिव्यांग वित्त व विकास महामंडळाचे सुरज बागवे यांच्यासह जिल्ह्यातील विविध ओबीसी संघटनांचे पदाधिकारी उपस्थित होते.

शिबिरात इतर मागास बहुजन कल्याण विभागाच्या विविध योजना, विद्यार्थ्यांसाठीच्या शिष्यवृत्ती, उच्च शिक्षणासाठीच्या योजना, वसतिगृहाच्या सुविधा, आधार योजना, परदेशात उच्च शिक्षणासाठी मिळणाऱ्या शिष्यवृत्ती तसेच विविध महामंडळांच्या कर्ज योजनांची सविस्तर माहिती देण्यात आली.

यावेळी काका कुडाळकर यांनी जिल्ह्यात ३० हजारांहून अधिक ओबीसी विद्यार्थी असताना केवळ सुमारे साडेसात हजार विद्यार्थी शिष्यवृत्तीचा लाभ घेत असल्याकडे लक्ष वेधले.शालेय स्तरापासून योजनांबाबत व्यापक जनजागृती करून पात्र विद्यार्थ्यांनी शिष्यवृत्तीचा लाभ घ्यावा, असे आवाहन त्यांनी केले.उच्च शिक्षण घेणाऱ्या विद्यार्थ्यांनी वसतिगृहाची सुविधा उपलब्ध न झाल्यास आधार योजनेचा लाभ घ्यावा, तसेच परदेशात उच्च शिक्षणासाठी उपलब्ध असलेल्या शिष्यवृत्ती योजनांचाही लाभ घ्यावा, असे त्यांनी सांगितले.

ओबीसी समाजासाठी विविध महामंडळांच्या माध्यमातून कर्ज योजना उपलब्ध असून नवउद्योजक आणि व्यावसायिकांनी या योजनांचा लाभ घेऊन आर्थिकदृष्ट्या सक्षम व्हावे, असे आवाहनही करण्यात आले. सुनील भोगटे, संदीप कदम यांनी यावेळी आपले विचार मांडले. उपस्थित अधिकाऱ्यांनी त्यांच्या विभागाशी संबंधित योजनांची सविस्तर माहिती दिली. बाळा कन्याळकर, संदीप कदम, सुनील पाटकर, संदीप चव्हाण, सुहास मोचेमणकर, तुकाराम तेली, साईनाथ आंबेडकर, लक्ष्मण तेली, अमिदी मेस्त्री यांच्यासह जिल्ह्यातील ओबीसी समाजाचे जिल्हाध्यक्ष, पदाधिकारी व कार्यकर्ते मोठ्या संख्येने उपस्थित होते.

यावेळी महात्मा ज्योतिबा फुले व क्रांतिज्योती सावित्रीबाई फुले यांच्या समग्र वाङ्गत्याचे पुस्तक उपस्थितांना भेट म्हणून देण्यात आले. भविष्यात जिल्ह्यातील प्रत्येक तालुक्याच्या ठिकाणी अशाच प्रकारची माहिती शिबिरे आयोजित करण्याचा मनोदय सहाय्यक संचालक उदयसिंह गायकवाड यांनी व्यक्त केला.