🛑ओरोस येथील आयोजित करण्यात आलेल्या ‘मेगा आरोग्य शिबिराला चांगला प्रतिसाद.

✒️लोकसंवाद /- ओरोस.

सिंधुदुर्ग वैद्यकीय महाविद्यालय,जिल्हा रुग्णालय आणि जिल्हा परिषद आरोग्य विभाग यांच्या संयुक्त विद्यमाने सिंधुदुर्ग नगरीतील वैद्यकीय महाविद्यालय संकुलात आज दिवसभर आयोजित करण्यात आलेल्या ‘मेगा आरोग्य शिबिराला ‘ सिंधुदुर्ग वासियांकडून विशेषतः ग्रामीण जनतेकडून उत्स्फूर्त प्रतिसाद मिळाला.

सिंधुदुर्ग जिल्ह्याचे पालकमंत्री नितेश राणे यांच्या संकल्पनेतून आयोजित करण्यात आलेल्या या शिबिराचे औपचारिक उदघाटन जिल्हा परिषदेचे उपाध्यक्ष तुकाराम तथा दादा साईल यांच्या हस्ते पार पडले.आरोग्य शिबिर हे रुग्णसेवेचे एक प्रभावी माध्यम असून अशा प्रकारची शिबिरे शहरांबरोबरच ग्रामीण भागातही आयोजित करावीत जेणेकरून रुग्णांना त्यांच्या दारापर्यंत सेवा मिळेल असे प्रतिपादन साईल यांनी यावेळी केले.

वैद्यकीय महाविद्यालयातील बाह्य रुग्ण कक्षात आयोजित करण्यात आलेल्या या शिबिराचे सुरुवातीला दीपप्रज्वलन करून औपचारिक उदघाटन करण्यात आले. यावेळी जि. प. चे आरोग्य सभापती प्रितेश राऊळ, जि.प. सदस्या दीपलक्ष्मी पडते, राष्ट्रवादी काँग्रेसचे (अजित पवार गट) जिल्हाध्यक्ष अबिद नाईक, सरचिटणीस सावळाराम अणावकर, वैद्यकीय महाविद्यालयाचे अधिष्ठाता डॉक्टर अनंत डवंगे, वैद्यकीय
अधिक्षक डॉ. शिल्पा नारायणकर,जिल्हा शल्य चिकित्सक डॉ. श्रीपाद पाटील, अतिरिक्त जिल्हा शल्य चिकित्सक डॉ.अर्जुन नरोटे,जिल्हा निवासी वैद्यकीय अधिक्षक डॉ. सुबोध इंगळे, खास शिबिरासाठी मुंबई व कोल्हापूर इथून आलेले तज्ञ डॉक्टर्स, जिल्हा रुग्णालय आणि जिल्हा वैद्यकीय महाविद्यालयाचे डॉक्टर्स, प्राध्यापक वर्ग, नर्सेस, कर्मचारी वर्ग आदी मोठ्या संख्येने उपस्थित होते.

जिल्ह्यातील रुग्णांना जिल्ह्यातच चांगली आरोग्यसेवा मिळावी यासाठी जिल्ह्याचे नेते खासदार नारायण राणे, पालकमंत्री नितेश राणे, आमदार निलेश राणे दीपक केसरकर हे प्रयत्नशील असून त्यांना आपण सर्वांनी साथ देऊया आणि हा जिल्हा आरोग्याच्या दृष्टीने सुसज्ज आणि सक्षम व्हावा यासाठी हातभार लावूया. सिंधुदुर्गवासियांनी या प्रयत्नांना संपूर्णपणे साथ द्यावी असे आवाहन त्यांनी केले.अशा प्रकारची आरोग्य शिबिरे जिल्ह्याच्या ग्रामीण भागातील प्राथमिक आरोग्य केंद्र आणि उपकेंद्रांमध्ये भरवण्यात यावीत आणि ग्रामीण जनतेला त्यांच्या दारापर्यंत सेवा देण्यात यावी असे आवाहन जि.प.चे आरोग्य सभापती प्रितेश राऊळ यांनी यावेळी केले.शिबिराचे औपचारिक उदघाटन केल्यानंतर पाहुण्यांनी शिबिर सुरू असलेल्या विविध दालनांना भेटी देत तिथल्या रुग्णांची विचारपूस केली. तसेच शिबिराला आलेले तज्ञ डॉक्टरांशीही चर्चा केली.

रुग्णालयातील सिटीस्कॅन कक्ष,रेडिओलॉजी कक्ष, कुपोषित बालकांसाठी उघडण्यात आलेला कक्ष, मिनी ऑपरेशन थिएटर आदी कक्षाना भेटी देत माहिती घेतली.दरम्यान जिल्ह्याचे पालकमंत्री नितेश राणे, वैद्यकीय शिक्षण मंत्री हसन मुश्रीफ यांनी दूरध्वनीवर वरून वैद्यकीय महाविद्यालयाचे अधिष्ठाता डॉ.डवंगे आणि जिल्हा शल्य चिकित्सक डॉ पाटील यांच्याशी फोनवर संपर्क साधून शिबिराला शुभेच्छा दिल्या.