🛑आता वाहनचालकांना पीएसव्ही चालक बॅज मिळविणे झाले सोपे..

◼️एसईसी प्रमाणपत्रा ऐवजी रहिवासी प्रमाणपत्रही ग्राह्य धरले जाणार.;राज्य परिवहन विभागाचा निर्णय..

✒️लोकसंवाद /- ओरोस.

सार्वजनिक सेवा वाहन (PSV) चालक बॅजसाठी अर्ज करणाऱ्या वाहनचालकांना दिलासा देणारा महत्त्वाचा निर्णय महाराष्ट्र शासनाच्या परिवहन आयुक्त कार्यालयाने घेतला आहे. स्थानिक वास्तव्याचा दाखला (SEC Certificate) उपलब्ध नसल्यामुळे PSV बॅजचे अर्ज प्रलंबित ठेवणे किंवा नामंजूर करण्याची प्रथा आता बंद करण्यात आली असून, त्याऐवजी रहिवासी प्रमाणपत्र किंवा वय, राष्ट्रीयत्व व अधिवास प्रमाणपत्रही ग्राह्य धरण्यात येणार आहे. अशी माहिती उपप्रादेशिक परिवहन विभाग, सिंधुदुर्गच्या वतीने देण्यात आली आहे.

परिवहन आयुक्त कार्यालयाने याबाबत सर्व उपप्रादेशिक परिवहन कार्यालयांना स्पष्ट सूचना दिल्या आहेत. त्यानुसार, अर्जदाराने महसूल विभागाकडून जारी करण्यात आलेले वय, राष्ट्रीयत्व व अधिवास प्रमाणपत्र (Age, Nationality And Domicile Certificate) अथवा रहिवासी प्रमाणपत्र (Residence Certificate) सादर केल्यास आणि महाराष्ट्र मोटार वाहन नियमांतील इतर आवश्यक अटींची पूर्तता केल्यास PSV चालक बॅज मंजुरीसाठी नियमानुसार पुढील कार्यवाही करण्यात येणार आहे.

यापूर्वी स्थानिक वास्तव्याचा दाखला (SEC Certificate) नसल्यामुळे अनेक अर्जदारांचे अर्ज रखडत असल्याच्या तक्रारी समोर येत होत्या. नव्या निर्देशांमुळे चालकांना आवश्यक कागदपत्रे सादर करून बॅज मिळविण्याची प्रक्रिया अधिक सुलभ होणार आहे. तसेच, अर्जदारांनी सादर केलेल्या प्रमाणपत्रांची सत्यता आवश्यकतेनुसार संबंधित महसूल विभागामार्फत किंवा उपलब्ध ऑनलाइन प्रणालीच्या माध्यमातून पडताळून पाहण्यात येणार असल्याचेही स्पष्ट करण्यात आले आहे.

उपप्रादेशिक परिवहन कार्यालय, सिंधुदुर्ग यांनी जिल्ह्यातील सर्व इच्छुक वाहनचालकांना या सुधारित सूचनांची नोंद घेऊन आवश्यक कागदपत्रांसह PSV चालक बॅजसाठी अर्ज सादर करण्याचे आवाहन केले आहे. शासनाच्या या निर्णयामुळे PSV बॅज मिळविण्याच्या प्रक्रियेतील अनावश्यक अडथळे दूर होऊन पात्र वाहनचालकांना मोठा दिलासा मिळणार असल्याचे मत व्यक्त होत आहे.