🛑आमदार दीपक केसरकर यांच्या पाठपुराव्याला यश; दोडामार्ग उपजिल्हा रुग्णालयासाठी वीस नव्या पदांना मंजुरी..

◼️तज्ज्ञ डॉक्टरांसह आवश्यक मनुष्यबळ उपलब्ध होणार दोडामार्गच्या आरोग्य सेवेला मिळणार नवे बळ..

✒️लोकसंवाद /- दोडामार्ग.

दोडामार्ग तालुक्यातील नागरिकांच्या आरोग्य सुविधांमध्ये लवकरच मोठी सुधारणा होणार असून, येथील उपजिल्हा रुग्णालयासाठी शासनाने २० नवीन पदांच्या निर्मितीस मंजुरी दिली आहे. नव्या रुग्णालयीन इमारतीनंतर आता मनुष्यबळाची कमतरता दूर होणार असल्याने परिसरातील रुग्णांना अधिक दर्जेदार व प्रभावी वैद्यकीय सेवा उपलब्ध होण्याचा मार्ग मोकळा झाला आहे.
राज्यातील १२ उपजिल्हा रुग्णालयांमध्ये नव्या पदनिर्मितीचा निर्णय घेण्यात आला असून, त्यामध्ये दोडामार्ग उपजिल्हा रुग्णालयाचाही समावेश आहे. मंजूर करण्यात आलेल्या पदांमुळे तज्ज्ञ वैद्यकीय अधिकारी, परिचारिका तसेच इतर आवश्यक कर्मचारी उपलब्ध होणार असून, रुग्णालयाची सेवा क्षमता लक्षणीयरीत्या वाढणार आहे.
काही दिवसांपूर्वी आमदार दीपक केसरकर यांनी रुग्णालयाला भेट देत येथील आरोग्य सुविधांचा प्रत्यक्ष आढावा घेतला होता. त्यानंतर आवश्यक पदनिर्मिती व मनुष्यबळ उपलब्धतेसाठी त्यांनी शासन स्तरावर पाठपुरावा केला होता. या प्रयत्नांना अखेर यश मिळाले असून रुग्णालयाच्या कार्यक्षमतेत मोठी भर पडणार आहे.या निर्णयाची माहिती उपसभापती तथा शिवसेना तालुकाध्यक्ष गणेशप्रसाद गवस यांनी प्रसारमाध्यमांना दिली. यावेळी त्यांनी पालकमंत्री नितेश राणे, आरोग्यमंत्री प्रकाश आबिटकर आणि आमदार दीपक केसरकर यांचे सहकार्य व पाठपुराव्याबद्दल आभार व्यक्त केले.

या नव्या पदनिर्मितीमुळे दोडामार्ग आणि परिसरातील नागरिकांना अधिक सक्षम, जलद व दर्जेदार आरोग्य सेवा उपलब्ध होणार असून, तालुक्याच्या आरोग्य व्यवस्थेसाठी हा निर्णय महत्त्वाचा टप्पा मानला जात आहे.