🛑सावंतवाडी शहरातील ऐतिहासिक घड्याळ कित्येक वर्ष निर्जीव अवस्थेत..

◼️लवकरच घड्याळ सुरु करण्यासाठी सावंतवाडीतील महिलांची नगरसेविका मोहिनी मडगावकरांकडे मागणी.

✒️लोकसंवाद /- सावंतवाडी.

सावंतवाडी शहराच्या मध्यवर्ती ठिकाणी उभारलेले आणि शहराची ओळख मानले जाणारे सावंतवाडी ची जान शान आणि मान असलेले घड्याळ गेल्या अनेक वर्षांपासून निर्जीव अवस्थेत आहे.या ऐतिहासिक घड्याळामुळे सावंतवाडी शहराच्या सौंदर्यात भर पडत होती.मात्र अनेक वर्षांपासून ते नादुरुस्त असल्याने नागरिकांमध्ये नाराजी व्यक्त होत आहे.या पार्श्वभूमीवर सावंतवाडीतील काही महिला नागरिकांनी एकत्र येत नगरसेविका मोहिनी मडगावकर यांच्याकडे लेखी निवेदन सादर केले. या निवेदनात शहराच्या मध्यवर्ती भागातील हे घड्याळ तातडीने दुरुस्त करून पुन्हा सुरू करण्यात यावे, अशी मागणी करण्यात आली आहे.
महिलांनी दिलेल्या निवेदनात नमूद केले आहे की, हे घड्याळ केवळ वेळ दर्शविणारे साधन नसून सावंतवाडी शहराच्या वैभवाचे आणि ऐतिहासिक परंपरेचे प्रतीक आहे. शहरात येणाऱ्या पर्यटकांचेही या घड्याळाकडे विशेष आकर्षण असते. त्यामुळे या वास्तूचे जतन करून ते पूर्ववत कार्यान्वित करणे गरजेचे आहे.

नगरसेविका मोहिनी मडगावकर यांनी महिलांच्या या मागणीची दखल घेत संबंधित प्रशासनाकडे पाठपुरावा करण्याचे आश्वासन दिले आहे.सावंतवाडीकरांची शान असलेले हे घड्याळ लवकरात लवकर सुरू होऊन पुन्हा एकदा शहराच्या सौंदर्यात भर पडेल, अशी अपेक्षा नागरिकांकडून व्यक्त होत आहे.