🛑लेमनग्रास हॉटेल समोरील भीषण अपघातात कुडाळच्या भूषण कुडाळकर यांचा दुर्दैवी मृत्यु;

✒️लोकसंवाद /- कुडाळ.

मुंबई-गोवा महामार्गावर कुडाळ येथील लेमनग्रास हॉटेलसमोर उभ्या असलेल्या ट्रकला दुचाकीने मागून जोरदार धडक दिल्याने झालेल्या भीषण अपघातात भूषण सुरेश कुडाळकर (वय ३५, रा. आंबेडकरनगर, कुडाळ) यांचा मृत्यू झाला. बुधवारी सायंकाळी सुमारे ४.४५ वाजण्याच्या सुमारास हा अपघात घडला.डोक्याला गंभीर दुखापत झाल्याने त्यांचा मृत्यू झाल्याचे सांगण्यात आले. या घटनेमुळे कुडाळ परिसरात हळहळ व्यक्त होत असून, कुडाळकर कुटुंबावर दुःखाचा डोंगर कोसळला आहे.

मिळालेल्या माहितीनुसार, भूषण कुडाळकर हे आपल्या आयस्मार्ट दुचाकीने सावंतवाडीहून कुडाळच्या दिशेने प्रवास करत होते. मुंबई-गोवा महामार्गावरील लेमनग्रास हॉटेलसमोर एक ट्रक उभा होता. या ट्रकचा अंदाज न आल्याने किंवा अन्य कारणाने त्यांच्या दुचाकीची ट्रकला पाठीमागून जोरदार धडक बसली. या धडकेत त्यांच्या डोक्याला गंभीर दुखापत झाली. अपघाताची तीव्रता मोठी असल्याने त्यांचा घटनास्थळीच मृत्यू झाल्याचे सांगण्यात आले.

अपघातानंतर भूषण यांना तातडीने कुडाळ ग्रामीण रुग्णालयात दाखल करण्यात आले. मात्र, रुग्णालयात आणण्यापूर्वीच त्यांचा मृत्यू झाला असल्याचे वैद्यकीय अधिकाऱ्यांनी तपासणीनंतर स्पष्ट केले. या घटनेची माहिती मिळताच त्यांचे मित्रपरिवार, परिचित आणि स्थानिक नागरिकांनी कुडाळ ग्रामीण रुग्णालयात गर्दी केली होती.
यातील ट्रक हा सावंतवाडी वरून कुडाच्या दिशेने जात होता. मात्र तो यादरम्यान कुडाळ येथील लेमनगाज हॉटेल समोर थांबला होता. याच ट्रकला भूषण च्या दुचाकीची मागून जोरदार धडक बसली.

◼️‘बंटी’च्या अकाली निधनाने मित्रपरिवाराला धक्का..

भूषण कुडाळकर हे मित्रपरिवारात ‘बंटी’ या टोपणनावाने परिचित होते. ते डेकोरेशनचा छोटेखानी व्यवसाय करत होते. क्रिकेटची त्यांना विशेष आवड होती. आपल्या मनमिळाऊ स्वभावामुळे ते मित्रपरिवारात परिचित होते. त्यांच्या अपघाती निधनाची बातमी समजताच मित्रपरिवारातून हळहळ व्यक्त करण्यात आली.

भूषण यांच्या पश्चात आई, पत्नी, एक मुलगा आणि अवघ्या दोन महिन्यांची मुलगी असा परिवार आहे. घरातील कर्त्या व्यक्तीचा अशा प्रकारे अकाली मृत्यू झाल्याने कुटुंबीयांवर मोठे संकट ओढवले आहे. विशेषतः अवघ्या दोन महिन्यांच्या चिमुकलीचे पितृछत्र हरपल्याने परिसरातून हळहळ व्यक्त होत आहे.

या अपघाताचा पंचनामा पोलीस कर्मचारी श्रीम. पाडगांवकर आणि वराडकर यांनी केला. अपघातामुळे महामार्गावरील उभ्या वाहनांच्या सुरक्षिततेचा प्रश्न पुन्हा ऐरणीवर आला असून, अशा ठिकाणी वाहनचालकांनी विशेष खबरदारी घेण्याची गरज व्यक्त होत आहे.