🛑“झाराप ग्रामपंचायतीचा कारभार संशयाच्या भोवऱ्यात! लाखोंची नळयोजना कोरडी; तत्कालीन सरपंचांच्या पत्रामुळे नवा वाद”

✒️लोकसंवाद /- कुडाळ.

झाराप ग्रामपंचायत हद्दीत उभारण्यात आलेली लाखो रुपयांची नळयोजना सध्या ‘पाणी नसलेली पाईपलाईन’ ठरली असून,गावकऱ्यांच्या संतापाचा अक्षरशः उद्रेक होऊ लागला आहे.प्रत्यक्षात नळ कोरडे, टाक्या रिकाम्या आणि गाव तहानलेले — पण कागदावर मात्र “सुरळीत पाणीपुरवठा सुरू” असल्याचा दावा केल्याने प्रशासनाचा कारभारच संशयाच्या भोवऱ्यात सापडला आहे.

मुंबई-गोवा महामार्गाच्या कामामुळे जुन्या पाईपलाईनला धोका निर्माण झाल्याने नवीन पाईपलाईन टाकण्याचे काम हाती घेण्यात आले.मात्र हे काम सुरुवातीपासूनच वादाच्या भोवऱ्यात अडकले.अनेक ठिकाणी ग्रामस्थांच्या तीव्र विरोधामुळे पाईप टाकण्याचे काम अर्धवटच सोडण्यात आले.परिणामी, योजना पूर्ण होण्याआधीच ‘अधांतरी’ लटकली — पाईप टाकले गेले, पण त्यातून पाण्याचा एक थेंबही गावात पोहोचला नाही!

या सगळ्यात सर्वात धक्कादायक बाब म्हणजे, स्थलांतरीत पाईपलाईन अपूर्ण असतानाही 1/12/2022 रोजी तत्कालीन सरपंचांकडून जीवन प्राधिकरण विभागाला “स्थलांतरित पाईपलाईनद्वारे पाणी सुरळीत सुरू आहे” असे लेखी पत्र देण्यात आल्याची माहिती समोर आली आहे.यामुळे “खर्च लाखोंचा, काम शून्य, आणि कागदावर सगळं व्यवस्थित” असा प्रकार उघडकीस आला असून, ग्रामस्थांमध्ये संतापाची लाट उसळली आहे.महाराष्ट्र जीवन प्राधिकरणाचे शाखा अभियंता अमोल कुंभार आणि दत्ता राऊळ यांनी झारापला भेट दिल्यानंतर वस्तुस्थिती अधिकच स्पष्ट झाली. “महामार्ग विभागाकडून जागा उपलब्ध न झाल्यामुळे पाईपलाईनचे काम पूर्ण होऊ शकलेले नाही. ज्या ठिकाणी ग्रामस्थांनी विरोध केला, तिथे पाईप टाकलेलेच नाहीत,” असे त्यांनी स्पष्ट सांगितले. म्हणजेच, प्रत्यक्षात काम अपूर्ण असतानाही ‘सुरळीत पाणीपुरवठा’ दाखवण्याचा प्रकार उघड झाला आहे.दरम्यान, ऐन उन्हाळ्यात नळयोजना कोलमडल्याने झाराप ग्रामस्थांना तीव्र पाणीटंचाईचा सामना करावा लागत आहे. महिलांना पाण्यासाठी भटकंती करावी लागत असून, “नळयोजना नाही, तर ही जनतेची थट्टा आहे का?” असा संतप्त सवाल गावातून उपस्थित होत आहे.

एकूणच, झारापमध्ये “नळ आहेत पण पाणी नाही, कागदावर मात्र सगळं सुरळीत” अशी विचित्र आणि संतापजनक परिस्थिती निर्माण झाली आहे. लाखो रुपयांचा खर्च नेमका कुठे गेला? अपूर्ण काम असूनही ‘सुरळीत’ दाखवण्यामागे कोणाचे हितसंबंध आहेत? या प्रश्नांची उत्तरे मिळेपर्यंत ग्रामस्थांचा संताप शमणार नाही, हे मात्र नक्की.