🛑“महामार्गाची खडी म्हणजे ‘कमाईचा धंदा’! दिवसा ढवळ्या चोरी; पावसात नागरिकांची लूट”

✒️लोकसंवाद /- समिल जळवी,कुडाळ.

झाराप येथे मुंबई-गोवा महामार्गावरील पुल उभारणीसाठी फोडण्यात आलेल्या जुन्या रस्त्याचे सिमेंट मिश्रित खडी साहित्य आता अक्षरशः ‘कमाईचा धंदा’ बनल्याचा संतापजनक प्रकार समोर आला आहे. महामार्गाच्या दुतर्फा टाकून ठेवलेली खडी काही स्थानिकांकडून आणि संबंधितांशी संगनमत असलेल्या ठेकेदारांकडून सर्रास चोरून नेली जात असून, पावसाळा सुरू होताच हीच खडी दुप्पट दराने नागरिकांच्या माथी मारली जात असल्याचा आरोप ग्रामस्थांकडून होत आहे.

विशेष म्हणजे ही चोरी दिवसाढवळ्या सुरू असतानाही संबंधित ठेकेदार आणि महामार्ग विभाग मात्र संशयास्पद शांतता बाळगून आहेत. लाखो रुपयांचे साहित्य खुलेआम गायब होत असताना कोणतीही ठोस कारवाई होत नसल्याने “नेमके कोणाच्या आशीर्वादाने हा काळाबाजार सुरू आहे?” असा संतप्त सवाल नागरिक उपस्थित करत आहेत.
स्थानिकांच्या माहितीनुसार, काही ठेकेदारांकडून हीच खडी मोठ्या प्रमाणात डेपो करून साठवून ठेवली जात असून, पावसाळ्यात नागरिकांची गरज वाढताच दुप्पट-तिप्पट दराने विक्री करण्याची तयारी सुरू असल्याची चर्चा परिसरात रंगली आहे.
महामार्गालगत राहणाऱ्या अनेक नागरिकांच्या घरांमध्ये पावसाळ्यात रस्त्याचे पाणी शिरते. संरक्षणासाठी किंवा भरावासाठी खडीची आवश्यकता भासते.मात्र, प्रत्यक्षात महामार्गाच्या कामातून उपलब्ध झालेली ही खडी नागरिकांना सहज मिळण्याऐवजी काहींच्या फायद्याचा व्यवसाय बनली असल्याने सर्वसामान्यांची आर्थिक लूट होत असल्याची भावना ग्रामस्थांनी व्यक्त केली.
“रस्ता फोडताना निर्माण झालेली खडी ही शासनाची मालमत्ता आहे. ती परस्पर विकण्याचा अधिकार कोणाला दिला?” असा प्रश्न आता जोर धरू लागला आहे. काही ठिकाणी रात्रीच्या वेळी ट्रॅक्टर आणि डंपरमधून खडी वाहतूक होत असल्याचाही आरोप स्थानिकांनी केला आहे.

दरम्यान या संपूर्ण प्रकाराची तात्काळ चौकशी करून संबंधित ठेकेदार, खडी चोरी करणारे तसेच संगनमत करणाऱ्या अधिकाऱ्यांवर कठोर कारवाई करावी, अन्यथा तीव्र आंदोलन छेडण्याचा इशारा ग्रामस्थांनी दिला आहे.