🛑वीज बील थकीत असले तरी परीक्षा काळात त्या कुटुंबियांचा वीज पुरवठा खंडित करू नका.;बाबुराव धुरी यांचे महावितरणला निवेदन.

✒️लोकसंवाद /- सिंधुदुर्ग.

परीक्षा कालावधी सुरू असताना आर्थिक अडचणीमुळे थकबाकीदार ग्राहकांचा वीज पुरवठा खंडित करू नये, अशी ठाम मागणी शिवसेना (उद्धव बाळासाहेब ठाकरे) जिल्हाप्रमुख बाबुराव दत्ताराम धुरी यांनी केली आहे.यासंदर्भात त्यांनी महाराष्ट्र राज्य वीज वितरण कंपनी, कुडाळ येथील अधिक्षक अभियंत्यांना लेखी निवेदन सादर केले आहे.

निवेदनात त्यांनी म्हटले आहे की, सध्या दहावी-बारावी तसेच इतर महत्त्वाच्या परीक्षा सुरू असून विद्यार्थ्यांसाठी हा काळ अत्यंत निर्णायक आहे. अनेक कुटुंबे आर्थिक अडचणीतून जात असताना थकबाकीच्या कारणावरून वीज पुरवठा खंडित केल्यास त्याचा थेट परिणाम विद्यार्थ्यांच्या अभ्यासावर होणार आहे. वीज नसल्यामुळे विद्यार्थ्यांचे मानसिक खच्चीकरण होऊन त्यांच्या शैक्षणिक प्रगतीवर विपरीत परिणाम होऊ शकतो.
“अशा संवेदनशील काळात प्रशासनाने मानवतावादी दृष्टिकोन ठेवावा. जिल्ह्यातील कोणत्याही विद्यार्थ्याच्या घरचा वीज पुरवठा परीक्षा संपेपर्यंत खंडित करू नये,” अशी मागणी धुरी यांनी निवेदनात केली आहे.

तसेच, सर्वसामान्य जनतेच्या अडचणी लक्षात घेऊन महावितरणने सहकार्याची भूमिका घ्यावी, अन्यथा याबाबत पुढील स्तरावर पाठपुरावा केला जाईल, असा इशाराही त्यांनी दिला आहे.
या मागणीमुळे पालक व विद्यार्थ्यांमध्ये समाधानाचे वातावरण निर्माण झाले असून, परीक्षा काळात अखंडित वीज पुरवठा मिळावा, अशी अपेक्षा व्यक्त होत आहे.