🛑सिंधुदुर्गातील वाहनधारकांमध्ये संताप ६३० रुपये मोजूनही HSRP नंबरप्लेटवरील अक्षरे गायब.

✒️लोकसंवाद /- सिंधुदुर्ग .

केंद्र सरकारच्या रस्ते वाहतूक मंत्रालयाने सुरक्षेच्या नावाखाली अनिवार्य केलेली ‘हाय सिक्युरिटी नंबर प्लेट’ (HSRP) आता वाहनधारकांसाठी डोकेदुखी ठरू लागली आहे. सिंधुदुर्ग जिल्ह्यात अनेक वाहनांच्या नंबरप्लेटवरील अक्षरे आणि अंक अवघ्या काही महिन्यांतच पुसले जात असल्याचे समोर आले असून, ६३० रुपये खर्चुनही निकृष्ट दर्जाचे साहित्य मिळत असल्याच पाहायला मिळत आहे.

१ एप्रिल २०१९ पूर्वीच्या सर्व वाहनांना HSRP प्लेट लावणे बंधनकारक आहे.या प्लेट्स अॅल्युमिनियमच्या असून त्यावर क्रोमियम होलोग्राम आणि लेसर-ब्रँडेड १० अंकी कोड असतो. चोरी आणि बनावटगिरी रोखणे हा यामागचा मुख्य उद्देश आहे. मात्र, सिंधुदुर्ग जिल्ह्यात धावणाऱ्या अनेक दुचाकी आणि चारचाकी वाहनांच्या प्लेट्सवरील काळा रंग उडून जात असून, प्लेट पूर्णपणे कोरी (धूसर) दिसत आहे.

◼️महागडी प्लेट, पण दर्जा शून्य ?

एका नंबरप्लेटसाठी शासनाने साधारण ६३० रुपये दर निश्चित केला आहे. रिवेट्स मारून घट्ट बसवलेली ही प्लेट ‘छेडछाड-प्रतिरोधक’ असल्याचा दावा केला जातो. पण जर नंबरच वाचता येत नसेल, तर या सुरक्षेचा उपयोग काय ? असा प्रश्न आता उपस्थित होत आहे.

“आम्ही दंडाच्या भीतीने पैसे भरून नंबरप्लेट लावली, पण आता नंबरच दिसत नाहीये. उद्या वाहतूक पोलिसांनी आम्हाला थांबवले, तर नंबर दिसत नसल्याचा दंड आम्ही का भरायचा? अशी संतप्त प्रतिक्रिया वाहन धारकांकडून उमटत आहे.

◼️HSRP प्लेटची प्रमुख वैशिष्ट्ये (जी कागदावरच उरली आहेत):

होलोग्राम : डाव्या कोपऱ्यात निळ्या रंगाचा अशोक चक्र होलोग्राम. लेसर कोड : १०-अंकी युनिक आयडेंटिफिकेशन नंबर.

सुरक्षितता : काढता न येणारे रिवेट्स.

दंड : प्लेट नसल्यास १,००० ते १०,००० रुपयांपर्यंत दंडाची तरतूद.

निकृष्ट दर्जाच्या प्लेट्स पुरवणाऱ्या कंपन्यांवर कारवाई होणार का? आणि ज्यांच्या प्लेट्स खराब झाल्या आहेत, त्यांना विनामूल्य नवीन प्लेट्स मिळणार का? याकडे आता सर्व सिंधुदुर्गवासीयांचे लक्ष लागले आहे. तोपर्यंत मात्र ‘नंबर’ गायब झालेल्या गाड्या घेऊन फिरणे वाहनधारकांसाठी टांगती तलवार ठरत आहे.