🛑साळीस्तेतील मृतदेहाचा तिलारीतील रक्तानेमाखलेल्या कारशी संबंध? मृताचा बेंगलोरशी दुवा फॉरेन्सिक तपासानंतर प्रकरण अधिक गूढ.

🖋️लोकसंवाद /- कणकवली.

मुंबई-गोवा महामार्गालगत साळीस्ते येथे सापडलेला मृतदेह हा बेंगलोर येथील श्रीनिवास रेड्डी यांचा असल्याचे प्राथमिक तपासात निष्पन्न झाले आहे. तर तिलारी दरीत आढळून आलेली रक्ताने माखलेली कार देखील त्यांच्या नावावर असल्याचे समजते. मात्र या प्रकरणाबाबत पोलिसांकडून अद्याप अधिकृत माहिती देण्यात आलेली नाही.

गुरुवारी दि. २३ ऑक्टोबर रोजी साळीस्ते येथील गणपती साणा परिसरात महामार्गालगत एका अज्ञात पुरुषाचा मृतदेह आढळून आला होता. मृताच्या अंगावर वाराचे खुणा होत्या, तर चेहरा विद्रूप करण्यात आला होता. त्याच दिवशी दोडामार्ग तालुक्यातील तिलारी मुख्य पुलाजवळ दरीच्या कडेला रक्ताने माखलेली एक कार आढळून आली होती.

पोलिसांनी या दोन्ही घटनांचा समांतर तपास सुरू केला असून, कारचा मालक आणि साळीस्ते येथे सापडलेला मृत व्यक्ती एकच असल्याचे प्राथमिक तपासात स्पष्ट झाले आहे.

साळीस्ते येथे सापडलेल्या मृतदेहाचा बेंगलोरशी संबंध असल्याची माहिती मिळताच पोलिसांनी तत्काळ बेंगलोरमधील दोन व्यक्तींशी संपर्क साधला. या दोन्ही व्यक्ती गुरुवारी दुपारी कणकवलीत दाखल झाल्या आणि त्यांनी मृतदेह पाहून तो श्रीनिवास रेड्डी यांचाच असल्याचे सांगितले. मात्र, त्या दोघी व्यक्ती मृताच्या नातेवाईक नसल्याने पोलिसांनी त्यांची ओळख गुप्त ठेवली आहे.

दरम्यान, पोलिसांचे एक विशेष पथक श्रीनिवास रेड्डी यांच्या कुटुंबीयांना भेटसाठी बेंगलोरला रवाना झाले आहे. ते पथक परत आल्यानंतरच मृतदेहाची अधिकृत ओळख पटेल, असे कणकवलीचे पोलीस निरीक्षक तेजस नलावडे यांनी सांगितले.

◼️तिलारीतील घटनास्थळी फॉरेन्सिक तज्ज्ञांचा तपास..

आज सायंकाळी फॉरेन्सिक विभागाचे अधिकारी तिलारी घाटातील त्या कारजवळ पोहोचले. त्यांनी कार आणि परिसराची सखोल पाहणी करून नमुने गोळा केले आहेत. या फॉरेन्सिक तपासाच्या अहवालानंतरच घटनास्थळावर काय घडले याचा अधिक स्पष्ट अंदाज येईल, असे पोलिसांनी सांगितले.

सद्यस्थितीत श्रीनिवास रेड्डी यांचा मृत्यू हा अपघात, आत्महत्या की नियोजित खून या सर्व शक्यतांचा तपास सुरू असून, पोलिसांनी या प्रकरणाला “हाय प्रोफाइल मर्डर केस” म्हणून गांभीर्याने घेतले आहे.