🛑सिंधुदुर्ग जिल्ह्यातील बेघर,अनाथ,रस्त्यावर राहणाऱ्या मुलांसाठी “साथी मोहीम” सुरु..

🖋️लोकसंवाद /- सिंधुदुर्ग.

राष्ट्रीय विधी सेवा प्राधिकरण,नवी दिल्ली आणि महाराष्ट्र राज्य विधी सेवा प्राधिकरण,मुंबई यांच्या संयुक्त विद्यमाने दुर्लक्षित,बेघर,अनाथ आणि रस्त्यावर राहणाऱ्या मुलांचे सर्वेक्षण करून त्यांना आधार नोंदणीद्वारे अधिकृत ओळख मिळवून देण्यासाठी “साथी मोहीम” सुरू करण्यात आली आहे. २६ मे ला सुरू झालेली ही मोहीम १५ ऑगस्टपर्यंत विविध ठिकाणी राबवली जाईल.या मोहिमेचा उद्देश केवळ मुलांची ओळख निर्माण करणे हा नाही, तर त्यांना शिक्षण, आरोग्य, निवारा, सामाजिक समावेश आणि कायदेशीर संरक्षणाच्या दृष्टीने आवश्यक सेवा उपलब्ध करून देणे हा आहे. सिंधुदुर्ग जिल्ह्यात जिल्हा विधी सेवा प्राधिकरण, सिंधुदुर्गचे अध्यक्ष तथा प्रमुख जिल्हा व सत्र न्यायाधीश हेमंत गायकवाड यांच्या मार्गदर्शनाखाली ही मोहीम राबवली जात आहे.

या मोहिमेत विविध तालुक्यांचे तहसीलदार,पोलीस,आरोग्य विभाग,शिक्षण विभाग, सामाजिक संस्था, बाल कल्याण समित्या, विधिज्ञ आणि विधी स्वयंसेवक सक्रियपणे सहभागी आहेत. जिल्हा विधी सेवा प्राधिकरणच्या सचिव संपुर्णा गुंडेवाडी यांनी या मोहिमेत सर्वसामान्य नागरिक आणि सामाजिक संस्थांनी सक्रिय सहभाग घेऊन निराधार मुलांविषयीची माहिती जिल्हा विधी सेवा प्राधिकरण, सिंधुदुर्ग कार्यालयाला पुरवावी,असे आवाहन केले आहे.