🛑रिव्हॉल्वर चालवून जखमी केल्याच्या आरोपातून निर्दोष मुक्तता.

🖋️लोकसंवाद /- सिंधुदुर्ग.

बेदरकारपणे व हयगयीने रिव्हॉल्वर चालवून जखमी केल्याच्या आरोपातून दिगंबर आर्लेकर यांची निर्दोष मुक्तता करण्यात आली आहे.वेंगुर्ले पोलीसांनी,यातील आरोपी दिगंबर राजाराम आर्लेकर याने त्याच्या ताब्यातील रिव्हॉल्वर निष्काळजीपणे चालवून उमेश रामचंद्र बाळे यांस जखमी केले व घर झडतीत त्याच्याकडून विनापरवाना ठासणीची बंदूक मिळून आली.म्हणून आरोपी विरुध्द भा.दं.वि. कलम ३३८, भारतीय हत्यार अधिनियम कलम ५(१), (क) / २७ व ३ / २५ (१), (अ) प्रमाणे वेंगुर्ला न्यायालयात गुन्हा दाखल केला.त्याकामी प्रथमवर्ग न्यायदंडाधिकारी, वेंगुर्ले श्री.डी.वाय. रायरीकर साहेब यांनी सबळ पुराव्या अभावी आरोपीची निर्दोष मुक्तता केली, आरोपीतर्फे अॅड. अजित भणगे, अॅड. मिहीर भणगे, अॅड. सुनिल मालवणकर, अॅड. स्वप्ना सामंत, अॅड. तेजाली भणगे,अॅड. आशुतोष कुळकर्णी यांनी काम पाहीले.

यातील हकीकत अशी की,आरवली बांध जीवन तळे नजीक आजगांव भोमवाडी, ता. सावंतवाडी येथे दि.२२/१२/२०१६ रोजी सुमारे १३.३० वा. आरोपी दिगंबर राजाराम आर्लेकर याने त्याच्या वाडीतील मुले जवळच क्रिकेट खेळत असताना आरोपीच्या मालकीच्या रिव्हॉल्वर मधून आरोपीने कोणतीही खबरदारी न घेता व निष्काळजीपणे चाचणी करीत असताना मानवी जिवीत व इतर व्यक्तीच्या सुरक्षेस धोका पोहोचेल अशा प्रकारे बेदरकारपणे व हयगयीने सोडलेली गोळी ही विकेट किपींग करत असलेले उमेश रामचंद्र बाळे, रा. आजगांव यास लागून तो जखमी झाला. त्याच्यावर ग्रामीण रुग्णालयात उपचार करण्यात आले. त्यानंतर वेंगुर्ले पोलीसांनी आरोपी याच्या घराची झडती घेतली असता त्याच्या ताब्यातून ठासणीची विनापरवाना बंदूक मिळून आली म्हणून आरोपी विरुध्द भा.दं.वि. कलम ३३८, भारतीय हत्यार अधिनियम कलम ५ (१), (क) / २७ व ३/२५ (१), (अ) प्रमाणे गुन्हा दाखल करुन आरोपपत्र तयार करण्या आले. याकामी सरकारी पक्षातर्फे वैद्यकीय अधिकाऱ्यासह सात साक्षीदार तपासण्यात आले, न्यायालयासमोर आलेला पुरावा व डॉक्टरांची साक्ष विचारात घेऊन प्रथमवर्ग न्यायदंडाधिकारी, वेंगुर्ले श्री. डी. वाय. रायरीकर साहेब यांनी सरकारी पक्ष हा आरोपी विरुध्द गुन्हा शाबित होईल असा पुरावा देवू न शकल्यामुळे आरोपीची निदर्दोष मुक्तता केली. याकामी आरोपीतर्फे अॅड. अजित भणगे, अॅड. मिहीर भणगे, अॅड. सुनिल मालवणकर, अॅड. स्वप्ना सामंत, अॅड. तेजाली भणगे, अॅड. आशुतोष कुळकर्णी यांनी काम पाहीले.