🛑बांधकाम खाते सेवकांची पतपेढी रत्नागिरी तर्फे सेवानिवृत्त सभासद व गुणवंत पाल्यांच्या सत्कार.

✍🏼लोकसंवाद /- सावंतवाडी.

बांधकाम खाते सेवकांची सहकारी पतपेढी या संस्थेचा अध्यक्ष म्हणून मी कार्यभाग स्वीकारल्यानंतर एक वर्षाचा कालावधी होत आहे. आमची संस्था अ वर्ग संस्था असून संस्थेची आर्थिक परिस्थिती मजबूत आहे. आपल्या सर्वांच्या सहकार्याने ती आणखी मजबूत करण्याचे आमचे प्रयत्न चालू आहेत. माझ्या कालावधीत कर्ज वाटप ४ कोटी रुपयांनी वाढले आहे. सभासदांच्या ठेवीवर जास्त व्याज देण्याचे प्रयत्न येत्या काळात करणार असून, सभासदांना कमी व्याजदरात कर्जपुरवठा कसा करता येईल यासाठी आम्हा सर्व संचालक मंडळाचे प्रयत्न चालू आहेत, असे प्रतिपादन बांधकाम खाते सेवकांची सहकारी पतपेढी, रत्नागिरी या संस्थेचे अध्यक्ष वंदन गावडे यांनी केले.

बांधकाम खाते सेवकांची सहकारी पतपेढी मर्यादित, रत्नागिरी या संस्थेचे सेवानिवृत्त सभासद यांचा सत्कार व सभासदांच्या गुणवंत पाल्यांच्या गुणगौरव सोहळा सावंतवाडी येथे रविवारी रवींद्र मंगल कार्यालय येथे आयोजित करण्यात आला होता यावेळी श्री. वंदन गावडे बोलत होते.

श्री. गावडे पुढे म्हणाले, संस्थेचे सभासद भाग भांडवल १० कोटी आहे. राखीव व इतर निधी ९.५६ कोटी रुपये असून २३.९३ कोटी रुपयांच्या ठेवी आहेत. तर खेळते भांडवल ५०.६७ कोटी रुपये आहे. संस्थेची आर्थिक स्थिती आणखी मजबूत करण्याचा संचालक मंडळाचा प्रयत्न राहील, असे श्री. वंदन गावडे यावेळी म्हणाले.

यावेळी बांधकाम खाते सेवकांची सहकारी पतपेढी संस्थेमार्फत सन २०१९ पासून जे सभासद सेवानिवृत्त झाले अशा ८०० सभासदांचा सत्कार सोहळा व २०१९ पासूनच्या ३०० सभासदांच्या पाल्यांच्या गुणगौरव सोहळा शाखा रत्नागिरी, शाखा चिपळूण व शाखा सावंतवाडी येथे करण्यात आला. यावेळी व्यासपीठावर संस्थेचे अध्यक्ष श्री. वंदन गावडे, उपाध्यक्ष श्री.सुभाष साळुंखे, संचालक महंम्मद ह.बा. मुजावर, शरद शेलार, विष्णू देसाई, दत्ताराम गोरे, नितीन सकपाळ, संदीप यादव, प्रमोद कांबळे, धोंडी पालवे, दिलीप मोहिते, दिलीप जाधव संचालिका सौ. सरमळकर उपस्थित होत्या. यावेळी सिंधुदुर्ग जिल्ह्यातील संस्थेच्या माजी संचालकांचा सत्कार करण्यात आला.