🛑आता नियमित दरातच सिंधुदुर्गातून एस. टी. विभागामार्फत स्लीपर सेवा सुरू…

▪️महिला व ज्येष्ठ नागरिकांना ५० टक्के सवलतिचा दर..

✍🏼लोकसंवाद /- सिंधुदुर्ग.

सिंधुदुर्गातून मुंबई, बोरिवली, कोल्हापूर, लातूर आदी मार्गावर प्रवास करणाऱ्या प्रवाशांसाठी एस.टी.ची शयनयन सेवा सुरू करण्यात आली आहे. प्रवाशांना एस.टी.च्या नियमित दरातच ही सेवा उपलब्ध करून देण्यात आली आहे. यात महिला व ज्येष्ठ नागरिकांना ५० टक्के सवलतही दिली जात असल्याची माहिती सिंधुदुर्गचे एस.टी. विभाग नियंत्रक अभिजित पाटील यांनी दिली. कुडाळ आगारातून ४ ऑक्टोबरला तर कणकवली आगारातून ५ ऑक्टोबरला या फेऱ्यांचा प्रारंभ झाला आहे.

खाजगी वाहतूकदारांच्या शयनयान बसेसच्या स्पर्धेत प्रथमच महाराष्ट्र राज्य मार्ग परिवहन महामंडळाची विना वातानुकूलित शयनयान बससेवा चालु करण्याचा निर्णय घेतला. त्यानुसार सिंधुदूर्ग विभागास एकूण ६ नवीन विना वातानुकूलित शयनयान बसेस उपलब्ध करुन देण्यात आलेल्या आहेत. या बसेस बांदा-बोरिवली, बांदा-मुंबई सेंट्रल आणि बांदा लातूर या मार्गावर धावणार आहेत. या बसेस बांदा स्थानकानंतर सावंतवाडी, कुडाळ, कसाल, कणकवली, तळेरे, चिपळूण आदी मार्गावर थांबणार आहेत. तर लातूर कडे जाणारी बस सांवतवाडी, कुडाळ, कणकवली, तळेरे, फोंडाघाट, कोल्हापूर, तुळजापूर आदी प्रमुख स्थानकांवर थांबणार आहे.

स्लीपर बसमध्ये तीस आसने आहेत. या बसेसना व्हेईकल ट्रेकिंग डिव्हाइस कार्यान्वित करण्यात आल्या आहेत. त्यामुळे बसचे लोकेशनही महामंडळाच्या अॅपवरून प्रवाशांना समजणार आहे. या बसचे आरक्षण हे महामंडळाच्या आरक्षण केंद्राव्यतिरिक्त प्रवाशी स्वता देखील ऑनलाईन माध्यमातून करू शकतात. यार बसमध्ये महिला प्रवाशी व ६५ वर्षावरील व्यक्तिंना (ज्येष्ठ नागरिक) तिकिट दरात ५० टक्के सवलत देण्यात आलेली आहे. ७५ वर्षांपेक्षा जास्त वयाच्या व्यक्तिस १०० टक्के सवलत म्हणजेच मोफत प्रवासच उपलब्ध होईल अशी माहिती श्री. पाटील यांनी दिली.