🛑पोयरे-सातवण जंगलमय भागात सापडला मानवी सांगाडा सापडल्याने उडाली खळबळ..

✍🏼लोकसंवाद /- देवगड.

देवगड तालुक्यातील पोयरे-सातवण येथील जंगलमय भागात मानवी सांगाडा सापडला आहे. तो मृतदेह बेपत्ता असलेल्या राजेंद्र मयेकर यांचा असल्याचे तपासात निष्पन्न झाले आहे. त्यांनी आत्महत्या केली असावी, असा संशय आहे. दरम्यान हा प्रकार दोन महिन्यापूर्वी झाला असावा, असा अंदाज आहे. त्यामुळे त्या ठिकाणी मिळालेली हाडे व कवटी तपासणीसाठी पाठवण्यात येणार असल्याचे पोलीस उपनिरीक्षक सुधीर कदम यांनी सांगितले.

पोलिसांनी दिलेल्या माहितीनूसार, पोयरे सातवण जंगलमय भागामध्ये मानवी कवटी व काही हाडे मिळून आली व कवटीच्या शेजारी काजुच्या झाडाला दोरीचा गळफास लावलेल्या स्थितीत आढळला. मृताच्या शरीराचे अवशेष हे जंगली श्वापदाने खाल्ले असल्यामुळे मिळाले नाहीत. पोलिसांनी घटनास्थळी भेट दिल्यानंतर त्या ठिकाणी मोबाईल, कपडे, अंगठी, छत्री आदी वस्तू मिळाल्या. पोयरे येथील १६ ऑगस्ट ला पत्ता झालेले राजेंद्र दामाजी मयेकर (वय ४१) यांची पत्नी रसिका मयेकर यांना व त्यांच्या इतर नातेवाईकांना दाखविल्यानंतर त्यांनी वस्तू ओळखून मयत हा तिचा पती राजेंद्र मयेकर असल्याचे सांगीतले.

पोयरे गावठणवाडी येथील राजेंद्र दामाजी मयेकर १६ ऑगस्ट ला सकाळी ९.३० च्या मानाने बेपत्ता झाल्याचे फिर्याद त्यांच्या पत्नीने देवगड पोलिस स्थानकात दिली होती. राजेंद्र यांची नोकरी गेल्यानंतर मानसिक स्थिती बिघडलेली होती. त्याच अवस्थेत तो दोन वेळा बेपत्ता झाले होते.. घटनास्थळी पोलिस निरिक्षक निळकंठ बगळे, पोलिस हवालदार आशिष कदम, संतोष नाटेकर, स्वप्निल ठोंबरे, प्रसाद आचरेकर यांनी भेट दिली व पंचनामा केला. मयताची मिळालेली हाडे व अवशेष हे डीएन्एसाठी पाठविण्यात येणार आहेत. याप्रकरणी आकस्मिक मृत्यु म्हणून नोंद करण्यात आली आहे.