🛑जिल्ह्यातील अकरा दिवसांच्या गणपतीला भक्तिमय वातावरणात निरोप..

✍🏼लोकसंवाद/- अजय गडेकर.

आपल्या लाडक्या बाप्पाची दहा अकरा दिवस मनोभावे व भक्तीभावाने सेवा केल्यानंतर जिल्ह्यातील आणि तालुक्यातील सर्वच ग्रामीण भागात शुक्रवारी सायंकाळी – रात्री अकरा दिवसांच्या गणपतीला भावूक वातावरणात निरोप देण्यात आला. गणपती बाप्पा मोरया ,पुढच्या वर्षी लवकर या च्या जयघोषात गणपतीला निरोप देण्यात आला.वेंगुर्ले शहरातील गाडीअड्डा येथील सार्वजनिक गणपतीचे गुरुवारी अनंत चतुर्दशीला शहरात जोरदार पुष्पवृष्टी करीत वाजतगाजत भाविकांच्या अलोट गर्दीत मांडवी खाडी येथे विसर्जन करण्यात आले.

चौदा विद्या चौसष्ट कलांचा अधीपती असलेल्या श्री गणेशाचे मंगळवारी (19 सप्टेंबट) भाद्रपद चतुर्थीला आगमन झाले. यंदा श्री गणेश चतुर्थी सुमारे 15 दिवस उशिराने आल्याने बहुसंख्य गणपती शाळेमध्ये गणेशमूर्ती वेळीच साकारल्या गेल्या. सुरुवातीचे तीन दिवस वगळता पावसाने गेले सात दिवस व अकराव्या दिवशीही जोरदार हजेरी लावली होती. अकरा दिवसांनी ठिकठिकाणी ‘गणपती बाप्पा मोरया ,मंगलमूर्ती मोरया , पुढच्या वर्षी लवकर या’या’ च्या जयघोषात ,फटाक्यांच्या आतशबाजीत बाप्पाला निरोप देण्यात आला. गणेशोत्सव कालावधीत सत्यनारायण पूजा संपन्न झाल्या. यावेळी बऱ्याच ठिकाणी पर्यावरण पूरक मखर बनविण्यात आली. तालुक्यात काही ठिकाणी सत्यनारायण पूजेसाठी बनविण्यात येणारे मखर अप्रतिम असे “चंद्रयान” या यानाची हुबेहूब प्रतिकृती बनविण्यात आली होती.वेंगुर्ले शहरात 16 ते 29 सप्टेंबर या गणेशोत्सव कालावधीत नगरपरिषद व पोलिस प्रशासन यांच्या वतीने बाजारपेठ व वाहतूक व्यवस्था यांचे सुयोग्य नियोजन करण्यात आले . नगरपरिषदेच्या वतीने शहरातील मांडवी , वडखोल ,भटवाडी , आडी पूल ,साकव , पत्रा पूल आदी सहा विसर्जन स्थळ ठिकाणी निर्माल्य कलश ची व्यवस्था करण्यात आली होती. गणेशोत्सव कालावधीत वीज वितरणच्या चांगल्या सेवेबद्दल भाविकातून समाधान व्यक्त करण्यात आले. वेंगुर्ले मुख्य बाजारपेठेतून आज शनिवारपासून एस. टी. सह अन्य अवजड वाहतूक सुरु होणार आहे. शहरातील वेंगुर्ले पोलिस स्थानकातील सार्वजनिक गणपती 17 दिवस विराजमान असणार आहे. दरम्यान राज्याचे शालेय शिक्षणमंत्री दिपक केसरकर , माजी पर्यावरण मंत्री आदित्य ठाकरे , खासदार विनायक राऊत ,आ. वैभव नाईक यांनी वेंगुर्ले तालुक्यात भेट देऊन गणपती दर्शन घेतले. तालुक्यात गणेशोत्सव शांततेत व भक्तिमय वातावरणात संपन्न झाला.