🛑सावंतवाडी उपजिल्हा रुग्णालयासाठी ‘इको सोनोग्राफी मशीन’ द्या.;राजु मसुरकर

✒️लोकसंवाद /- सावंतवाडी.

सावंतवाडी शहरातील उपजिल्हा रुग्णालयात दररोज सावंतवाडी, दोडामार्ग आणि वेंगुर्ला तालुक्यांतून शेकडो रुग्ण उपचारासाठी येतात. यामध्ये हृदयविकाराच्या रुग्णांचे प्रमाण मोठे असूनही, रुग्णालयात हृदयाची ‘इको सोनोग्राफी मशीन’ उपलब्ध नाही. त्यामुळे गोरगरीब रुग्णांना नाईलाजाने खासगी लॅबमध्ये जाऊन तब्बल २५०० रुपयांचा भुर्दंड सहन करावा लागत आहे. ही लूट थांबवण्यासाठी भाजपा प्रदेशाध्यक्ष व माजी पालकमंत्री रवींद्र चव्हाण यांनी आमदार निधीतून २० लाख रुपये मंजूर करून तात्काळ इको मशीन उपलब्ध करून द्यावी, अशी जोरदार मागणी ‘जीवन रक्षा वैद्यकीय प्रतिष्ठान’चे अध्यक्ष राजू मसुरकर यांनी केली आहे.यापूर्वी रवींद्र चव्हाण यांनी पालकमंत्री असताना अवघ्या ८ दिवसांत सीटी स्कॅन मशीन मंजूर केली होती, ज्याचा फायदा आजवर २५ हजारांहून अधिक गोरगरीब रुग्णांना झाला आहे. त्याच धर्तीवर आता हृदयविकाराच्या अचूक निदानासाठी ही २० लाखांची इको मशीन तातडीने मंजूर करावी, अशी हाक मसुरकर यांनी निवेदनाद्वारे दिली आहे.