🛑दुकानाच्या वादातून तरुणाचा खून मृतदेह रेल्वेस्थानका जवळ टाकला.; दोघांना अटक.

✒️लोकसंवाद /- सावंतवाडी.

दुकानाच्या वादातून गोव्यात एका २३ वर्षीय तरुणाचा बेदम मारहाण करून खून करण्यात आला. त्यानंतर पुरावा नष्ट करण्यासाठी त्याचा मृतदेह सावंतवाडी रेल्वे स्थानकाजवळील निरवडे रस्त्यावर आणून फेकून दिला. या खळबळजनक प्रकरणाचा अवघ्या काही तासांत छडा लावत सावंतवाडी पोलिसांनी मुख्य संशयित हॉटेल मालकासह दोघांना ओल्ड गोवा येथून ताब्यात घेतले आहे.

आजिम खान (वय २३, मूळ रा. बहराइच, उत्तर प्रदेश; सध्या रा. ओल्ड गोवा) असे खून झालेल्या तरुणाचे नाव आहे. मंगळवारी संध्याकाळी साडेसहा वाजण्याच्या सुमारास सावंतवाडी रोड रेल्वे स्थानकासमोरील हॉटेल कोकण क्राऊन लगतच्या रस्त्यावर स्थानिक ग्रामस्थांना एका तरुणाचा मृतदेह संशयास्पद स्थितीत पडलेला आढळला.ग्रामस्थांनी तातडीने पोलीस पाटील आणि पोलिसांना या घटनेची माहिती दिली.

सावंतवाडी पोलिसांनी घटनास्थळी धाव घेऊन मृतदेहाची तपासणी केली असता मतदेहाजवळ सापडलेल्या बॅगेतील ओळखपत्र आणि कागदपत्रांवरून त्याची ओळख पटली. तसेच उपजिल्हा रुग्णालयातील शवविच्छेदनात पोटावर झालेल्या गंभीर मारहाणीमुळेच त्याचा मृत्यू झाल्याचे स्पष्ट झाले. आजिम खान हा गेल्या तीन वर्षांपासून ओल्ड गोवा येथील एका हॉटेलमध्ये शॉर्मा बनवण्याचे काम करत होता. हॉटेल मालकाचा मेहुणा आणि आजिम हे दोघे मिळून स्वतंत्र शॉर्मा सेंटर सुरू करण्याच्या तयारीत होते. याचा राग मनात धरून हॉटेल मालक दीपराज गोवेकर याने मंगळवारी दुपारी आजिमला ओल्ड गोवा येथे बोलावून घेतले आणि साथीदाराच्या मदतीने त्याला जबर मारहाण केली. मारहाण सुरू असताना आजिमने पुण्यातील भावाला फोन लावून मदतीचा प्रयत्नही केला, पण हल्लेखोरांनी लगेच त्याचा फोन हिसकावून घेतला. या भीषण मारहाणीत पोटावर गंभीर घाव बसल्याने आजिमचा जागीच मृत्यू झाला. त्यानंतर संशयितांनी गुन्हा लपवण्यासाठी मृतदेह गाडीत घालून सावंतवाडी जवळील निरवडे नमसवाडी येथील निर्जन रस्त्यावर फेकून दिला आणि तिथून पळ काढला.

घटनेचे गांभीर्य ओळखून पोलीस निरीक्षक राजेंद्र मगदूम यांच्या मार्गदर्शनाखाली पोलिसांनी तत्काळ तपास चक्रे फिरवून ओल्ड गोवा येथे छापा टाकला आणि हॉटेल मालक दीपराज गोवेकर याच्यासह त्याच्या साथीदाराला ताब्यात घेतले. मयत आजिमचा मेहुणा कासिम महंमद याने दिलेल्या तक्रारीवरून सावंतवाडी पोलिसांनी हा गुन्हा दाखल केला आहे. खुनाची घटना गोवा हद्दीत घडल्याने हा गुन्हा शून्य नंबरने (झिरो एफआयआर) नोंदवून पुढील कारवाईसाठी ओल्ड गोवा पोलिसांकडे वर्ग करण्यात आला आहे.