🛑अखेर कालवी तिठा ते कालवीबंदर रस्त्याची डागडुजी सुरू.

◼️बांधकाम सभापती संतोष साटविलकर यांची “ऑन स्पॉट” भेट.;पत्रकार आबा खवणेकर यांच्या मागणीला यश..

✒️लोकसंवाद /- सिंधुदुर्ग.

ग्रामपंचायत आंदुर्ले आणि ग्रामपंचायत केळूस हद्दीतील कालवी तिठा ते कालवीबंदर या खड्डेमय रस्त्याची दुरुस्ती आजपासून सुरू करण्यात आली आहे. या रस्त्याच्या दुरुस्तीबाबत पत्रकार आबा खवणेकर यांनी जिल्हा परिषद बांधकाम सभापती संतोष साटविलकर यांच्याकडे केलेल्या पाठपुराव्याला यश आले आहे. बांधकाम सभापती संतोष साटविलकर यांनी आज कालवी तिठा ते कालवीबंदर मार्गावर भेट देऊन प्रत्यक्ष पाहणी केली. तसेच या मार्गावरील खड्डे बुजविण्यास आजपासून सुरुवात झाली आहे. यामुळे स्थानिक नागरिकांनी जिल्हा परिषद बांधकाम सभापती संतोष साटविलकर आणि पत्रकार आबा खवणेकर यांचे आभार मानले आहेत.

यावेळी जिल्हा परिषद बांधकाम सभापती संतोष साटविलकर यांच्या समवेत म्हापण जिल्हा परिषद सदस्या सौ.यज्ञा साळगावकर, तेंडोली जिल्हा परिषद सदस्या सौ.आरती पाटील, वेंगुर्ले शाखा अभियंता,जी एस महाडेश्वर शाखा अभियंता वेंगुर्ले, पत्रकार आबा खवणेकर, ग्रामस्थ नागेश आरोलकर आदी यावेळी उपस्थित होते.

तसेच तेंडोली जिल्हा परिषद सदस्या सौ.आरती पाटील यांनीही खड्डे बुजविण्यासाठी प्रयत्न केल्याने पत्रकार आबा खवणेकर यांनी सौ.पाटील यांचे आभार मानले.दरम्यान हा कालवी तिठा ते कालवीबंदर रस्ता जिल्हा परिषदेच्या ताब्यात असल्याने दिवाळी नंतर बजेटमध्ये घेऊन चांगला सुस्थितीत करण्याचे आश्वासन यावेळी बांधकाम सभापती श्री.साटविलकर यांनी श्री खवणेकर यांना दिले आहे.

बांधकाम सभापती संतोष साटविलकर यांची कार्यतत्परता

बांधकाम सभापती संतोष साटविलकर यांच्याकडे या रस्त्याबाबत तक्रार गेल्याने त्यांनी कार्यतत्परता दाखवीत पत्रकार आबा खवणेकर यांना आश्वासित केले. त्यामुळे या खड्डेमय रस्त्याची डागडुजी सुरू झाली आहे.

पत्रकार आबा खवणेकर यांच्या पाठपुराव्याला यश

ग्रामपंचायत आंदुर्ले आणि ग्रामपंचायत केळूस हद्दीतील कालवी तिठा ते कालवीबंदर या रस्त्याची अक्षरशः दयनीय अवस्था झाली होती. याबाबत पत्रकार आबा खवणेकर यांनी जिल्हा परिषद बांधकाम सभापती संतोष साटविलकर यांची भेट घेऊन तातडीने कालवीबंदर रस्त्यावरील पडलेले खड्डे बुजविण्यात यावे, अशी मागणी केली होती. तसेच रस्त्याची दुरुस्ती तत्काळ न केल्यास उपोषणाचा इशाराही आबा खवणेकर यांनी बांधकाम सभापती साटविलकर यांना दिला होता. त्यामुळे बांधकाम सभापती यांनी तत्काळ अधिकारी वर्गाला खड्डेमय रस्त्याच्या दुरुस्तीबाबत सूचना दिल्या. त्यामुळे या रस्त्याचे काम मार्गी लागले आहे.

मागील दोन वर्षांपासून कालवी तिठा ते कालवीबंदर रस्त्याची दयनीय अवस्था

मागील दोन वर्षात कालवी तिठा ते कालवीबंदर रस्त्याची वाताहत झाली आहे. या भागातील स्थानिक नागरिक आणि पर्यटनासाठी येणाऱ्या पर्यटकांना या खड्डेमय रस्त्यातून जावे लागते. तर काही दिवसांवर गणपती सण असून यामुळे भक्तगणांना याचा त्रास सहन करावा लागणार होता. पण, आजपासून खड्डे भरण्यास सुरुवात झाल्याने नागरिकांमध्ये समाधान व्यक्त होत आहे.