🛑म्हापण येथील संजीवनी आनंदाश्रम आबालवृद्धांसाठी जीवनावश्यक वस्तूंची मदत..

✒️लोकसंवाद /- वेंगुर्ला.

मातोंड येथील व सध्या मुंबई येथे वास्तव्यास असलेल्या आरती राजू गावडे यांनी आपल्या सासू कै.सुवासिनी सत्यवान गावडे यांच्या स्मरणार्थ सामाजिक बांधिलकी जपत सीता राम संजीवनी आनंदाश्रम, म्हापण येथील आबालवृद्धांसाठी जीवनावश्यक वस्तूंची मदत केली. गेल्यावर्षीही त्यांनी आश्रमाला मदत केली होती. त्याच सामाजिक उपक्रमाची परंपरा कायम ठेवत यावर्षीही त्यांनी जीवनावश्यक वस्तू देऊन आश्रमातील रहिवाशांना आधार दिला.

आरती गावडे यांच्या वतीने त्यांचे प्रतिनिधी हेमंत परब, प्रसाद परब, योगेश परब, भरत परब, सूर्यकांत खोत व राजन घाडीगावकर यांनी आश्रमाला आवश्यक असलेल्या जीवनावश्यक वस्तू आश्रमाच्या संचालिका तुळसकर मॅडम यांच्याकडे सुपूर्द केल्या.
कै. सुवासिनी सत्यवान गावडे यांच्या स्मरणार्थ करण्यात आलेल्या या मदतीमुळे आश्रमातील रहिवाशांना मोठा दिलासा मिळाला. केवळ स्मरणापुरते न राहता सामाजिक उपक्रमातून आपल्या आप्तेष्टांच्या आठवणी जपण्याचा आरती गावडे यांचा हा उपक्रम कौतुकास्पद ठरला आहे.
सीता राम संजीवनी आनंदाश्रमात विविध कारणांमुळे आधाराची गरज असलेल्या आबालवृद्धांना निवारा व आवश्यक सुविधा उपलब्ध करून दिल्या जातात. अशा संस्थांना समाजातील दानशूर व्यक्ती व नागरिकांकडून मिळणारे सहकार्य महत्त्वाचे ठरते. सौ. गावडे यांनी गेल्या वर्षापासून सुरू केलेली मदतीची परंपरा यावर्षीही कायम ठेवल्याने त्यांच्या सामाजिक जाणिवेचे सर्व स्तरांतून कौतुक होत आहे.