🛑अल्पवयीन मुलीची ३.२५ लाखांची दागिने फसवणूक प्रकरणात ॲड. विनय मांडकुलकर यांच्या युक्तिवादाने संशयित आरोपी दीपक सावंत यास जामीन मंजूर!

✒️लोकसंवाद /- कुडाळ.

आजाराच्या खोट्या कारणावरून एका अल्पवयीन मुलीची तब्बल ३ लाख २५ हजार रुपयांच्या दागिन्यांची फसवणूक केल्याच्या आरोपाखाली अटक करण्यात आलेल्या संशयित आरोपीला मे. कुडाळ न्यायालयाने मोठा दिलासा दिला आहे. संशयित आरोपी दीपक विनायक सावंत (वय २०, रा. नानेली माणगाव, ता. कुडाळ) याची मे. न्यायालयाने रक्कम रुपये ५०,०००/- (पन्नास हजार) च्या वैयक्तिक जामिनावर व कायदेशीर अटी-शर्तींवर मुक्तता करण्याचे आदेश दिले आहेत. या खटल्यामध्ये आरोपीच्या वतीने विधीज्ञ ॲड. विनय मांडकुलकर यांनी केलेला प्रभावी व कायदेशीर युक्तिवाद मे. न्यायालयाने ग्राह्य धरला असून, त्यांना मुख्य डिफेन्स कौन्सिल ॲड. विवेक मांडकुलकर, ॲड. प्रणाली मोरे, ॲड. वृषांग जाधव व ॲड. सुयश गवंडे यांनी सहकार्य केले.

संशयित आरोपी दीपक सावंत याने काही वर्षांपूर्वी एका अल्पवयीन मुलीला स्वतःच्या आजारपणाचे खोटे कारण सांगून तिच्याकडून ३ लाख २५ हजार रुपये किमतीचे सोन्या-चांदीचे दागिने घेऊन तिची फसवणूक केली होती. याप्रकरणी कुडाळ पोलीस ठाण्यात गुन्हा दाखल झाल्यानंतर पोलिसांनी कारवाई करत संशयित आरोपी दीपक सावंत यास दिनांक २२ ऑगस्ट २०२६ रोजी अटक केली.
अटक केल्यानंतर पोलिसांनी आरोपीला मे. कुडाळ न्यायालयात हजर केले असता, न्यायालयाने आरोपीची २ दिवसांसाठी पोलीस कोठडीत रवानगी केली होती. त्यानंतर पोलीस कोठडीची मुदत संपल्याने दिनांक २४ ऑगस्ट २०२६ रोजी आरोपीची न्यायालयीन कोठडीत (MCR) रवानगी करण्यात आली.

आरोपीची न्यायालयीन कोठडीत रवानगी होताच, त्याच्या वतीने विधीज्ञ ॲड. विनय मांडकुलकर यांनी दिनांक २४ ऑगस्ट २०२६ रोजी मे. कुडाळ न्यायालयात जामिनासाठी अर्ज दाखल केला.
सदर जामीन अर्जावर न्यायालयात दोन्ही बाजूंचा युक्तिवाद झाला. सुनावणी दरम्यान बचाव पक्षाचे वकील ॲड. विनय मांडकुलकर यांनी आरोपीचे कमी वय (२० वर्षे), तपासाची झालेली प्रगती आणि कायद्याच्या चौकटीतील विविध तांत्रिक मुद्दे न्यायालयाच्या निदर्शनास आणून दिले.
बचाव पक्षाचा हा युक्तिवाद आणि मांडलेले कायदेशीर मुद्दे ग्राह्य धरून मे. कुडाळ न्यायालयाने दिनांक २७ ऑगस्ट २०२६ रोजी आरोपी दीपक विनायक सावंत यास ५० हजार रुपयांच्या जामिनावर व योग्य त्या अटी-शर्तींवर मुक्त करण्याचा महत्त्वपूर्ण आदेश दिला. या खटल्यात आरोपीच्या वतीने ॲड. विनय मांडकुलकर, ॲड. विवेक मांडकुलकर, ॲड. प्रणाली मोरे, ॲड. वृषांग जाधव व ॲड. सुयश गवंडे या वकील पथकाने काम पाहिले.